AMTEGA e INCIBE xuntan forzas para formar e concienciar en ciberseguridade

A Axencia para a Modernización Tecnolóxica de Galicia (AMTEGA) e o Instituto Nacional de Ciberseguridade (INICIBE) veñen de asinar un acordo para traballar no fomento de máis e mellores recursos que garanta unha Sociedade da Información segura e, tamén, para impulsar actividades de capacitación, sensibilización e concienciación dirixidas ás empresas e ás persoas, facendo especial fincapé nos menores de idade, nas familias, nos educadores e nos centros docentes. Asemade, favorecerase a transparencia e o intercambio de coñecemento e experiencias.
A sinatura deste acordo enmárcase dentro das medidas do Plan Director de Ciberserguridade da Xunta, que ten entre os seus obxectivos principais protexer os servizos públicos dixitais fronte a este tipo de ameazas e “crear un clima de confianza para xeneralizar o uso deste servizos”.
Tras a sinatura do acordo, o seguinte fito será a xuntanza da comisión de seguimento, integrada por representantes de ambas entidades para concretar as actuacións e servizos que se desenvolverán. Segundo lembrou AMTEGA, a ciberseguridade é “un elemento crave no proceso de transformación dixital que estamos a vivir e un tema vital importancia a nivel empresarial”, tal e como demostran os informes recentes de todo tipo de entidades, incluído o observatorio galego OSIMGA, que destaca que no 2018 o 85,3% das empresas de 10 ou máis traballadores e o 41,6% das microempresas galegas empregaban xa sistemas de seguridade. “Entre as microempresas este indicador increméntase en 2 puntos porcentuais con respecto ao ano anterior”, explica a axencia, engadindo, respecto da percepción dos cidadáns, “que o 90% dos galegos considera recomendable ter máis información para navegar de xeito seguro pola Rede”.