A sede de SmartPEME na Estrada seguirá dando formación e asesoramento TIC dous anos máis

Ao abeiro do seu “compromiso co emprendemento da Estrada”, a Deputación de Pontevedra anunciou esta semana a revalidación do punto de atención no concello do programa provincial SmartPEME, impulsado pola entidade para a capacitación tecnolóxica das PEME, os profesionais e os autónomos da provincia. En virtude da iniciativa anunciada esta semana, a Deputación amplía ata febreiro do 2022 o devandito punto de atención, situado na vila pontevedresa desde o 2018.
Mediante este espazo, que ocupa unha oficina no Viveiro local de Empresas, a institución provincial continuará fornecendo obradoiros formativos, asesoramento e actividades mellorar a rendibilidade e a competitividade empresarial polo vieiro das novas tecnoloxías. A Deputación tamén compartiu a súa intención de converter a sede de SmartPEME na Estrada nun enclave onde se favoreza o traballo en rede entre os distintos axentes do territorio e que sirva tamén de punto de encontro para as empresas da comarca.
A oficina de SmartPEME na Estrada está aberta no Viveiro de Empresas do municipio o primeiro e o último mércores de cada mes, en horario de mañá (de 10 a 14.30 horas) e de tarde (de 16 a 19 horas). Desde a súa posta en marcha, ademais da atención no punto informativo, estase a realizar un obradoiro formativo mensual dirixido ás persoas emprendedoras, autónomas e PEME. Segundo informou a Deputación, neste punto local prestáronse xa máis de de 111 asesoramentos personalizados a 23 persoas autónomas, persoas emprendedoras e PEME do concello da Estrada e organizáronse 13 obradoiros formativos en materia de tecnoloxía dentro do ámbito empresarial.