A Deputación de Ourense activa un programa de adestramento deportivo por Internet

Estes días as nosas institucións están en envorcar esforzos en achegar recursos para ternos comunicados, informados, entretidos e, tamén, en forma. A Deputación de Ourense, seguindo esta liña de mitigar os efectos da crise sanitaria do coronavirus e a reclusión forzosa das familias nos fogares, lanzou un programa de adestramento deportivo a través de Internet. Chámase En forma e ten como obxectivo “favorecer o mantemento activo de toda a familia nestes días de confinamento no domicilio”.
A primeira sesión comezou este luns 30 de marzo ás 10.00 horas cunha xeira de ximnasia de mantemento e acondicionamento físico. O programa desenvolverase de luns a venres en dúas sesións: ás 10 e ás 19 horas, esta última sesión, a do serán, máis envorcada ao adestramento en familia.
A cidadanía poderá seguir en liña as actividades a través das redes sociais do Pazo dos Deportes: Facebook (@PazoPacoPazDeputaciondeOurense), Twitter (@PazoPacoPaz) e Youtube (@PazoPacoPaz).
Con esta iniciativa, a Deputación de Ourense ofrece un amplo programa de actividades, que van desde ximnasia de mantemento a baile, pasando por pilates, ioga, step e gap. O programa En forma manterase activo mentres dure o Estado de Alarma, coa finalidade de “favorecer un confinamento máis activo e saudable para a poboación ourensá”.