O RockLab e o Día das Letras poñen fin ao Salón do Libro máis virtual da historia

Boa parte dos grandes acontecementos culturais que estaban previstos para esta primavera na nosa terra tiveron que adaptarse ás posibilidades que ofrecen as novas tecnoloxías, dándose o fito de que, malia as complexidades dos tempos que estamos a vivir, todos eles acadaron algún que outro fito novo en materia de repercusión e participación. Por exemplo a edición máis virtual do Salón do Libro de Pontevedra, que leva dous meses de intensa actividade (dende o 12 de marzo, cando se tiveron que pechar as portas físicas) nas redes e na súa web focalizando boa parte dos seus esforzos en amenizar o confinamento da cativada e achegar ás familias recursos de xogos. Este domingo, o salón pechará as súas portas dixitais coincidindo co 17 de maio, o Día das Letras Galegas.
En definitiva, non só foi o Salón do Libro máis virtual da historia, senón tamén o máis longo (a clausura estaba programada para o 22 de marzo) e o máis envorcado en mitigar, con creatividade e lecer, as consecuencias da reclusión das familias nos seus fogares.
A mesma fórmula do virtual será que presida o concerto de clausura desta edición, a cargo do RockLab, actividade músical do Concello de Pontevedra, impartida no Pazo da Cultura e dirixida por Gonzalo Maceira. Segundo informa Maceira, dar forma a esta actividade foi un reto complexo: “Traballamos con 30 alumnos/as de 6 a 10 anos a través de Goole Classroom e Zoom para as clases e levamos a cabo sesións de diferente tipo: individuais, por grupos pero sobre todo moita formación para pais, que se involucraron moitísimo no proxecto. Sen a súa colaboración e implicación 100% non tería sido posible chegar a porto”.
A emisión das actuacións dos Rock N roll Monsters e Os Cabaleiros e Damas do Rock terá lugar o domingo 17 cara ás 18h. no Facebook, Instagram, Youtube e web do Salón. Tamén está prevista a segunda parte do obradoiro Aprende banda deseñada con Fiz de Kiko Dasilva. Ao longo do día celebrarase difundiranse diferentes pezas audiovisuais a xeito de recompilacións do acontecido.