Os contidos do Arde Lucus máis virtual superaron as 85.000 reproducións

O Arde Lucus, a popular festa romana da cidade de Lugo, que este ano veu marcada pola necesidade de garantir a distancia social e adaptación a formatos reducidos ou dixitais das actividades do programa, clausurou a súa XIX edición, a máis virtual da historia debido á crise sanitaria, chegando a máis de 350.000 persoas de toda a contorna europea. Segundo informou o Concello, impulsor da festividade, “este dato reflicte o alcance das publicacións nas redes sociais do evento que este ano cobraron un especial protagonismo, chegando a países como Reino Unido, Portugal, Estados Unidos, Arxentina, Alemania, Italia, Francia, Rumanía, Colombia ou Brasil, entre outros”.
O Goberno lucense engadiu que os contidos publicados a través destas canles superaron as 135.000 reaccións (gústames, comentarios e publicacións compartidas) en Facebook, Instagram, Twitter e YouTube. Respecto aos contidos audiovisuais publicados, os vídeos rexistran máis de 85.000 reproducións, en menos dunha semana, unha cifra que continúa a incrementarse.
A alcaldesa, Lara Méndez valorou de xeito moi positivo estes datos “estamos a falar de que chegamos a todo o mundo e iso, evidentemente, significa que o Arde Lucus xa é internacional, e que ademais vai a ter unha repercusión importante de cara ao ano 2021, supoñendo unha fiestra aberta ao mundo da nosa cidade, o que traerá máis visitantes que queiran gozar de Lugo a pé de rúa”.
Os contidos máis visualizados foron un spot promocional da edición e un emotivo documental elaborados polo Concello, no que representantes das 19 asociacións vinculadas á celebración falan da súa importancia para a cidade. Tamén acumulan centos de reproducións os distintos vídeos elaborados polos colectivos, onde se reflicten aspectos importantes da historia romano castrexa de Lugo.