GAIN achega unha nova liña de 3 millóns de euros para apoiar proxectos anti-COVID

A Axencia Galega de Innovación (GAIN) vai achegar unha nova liña de axudas para apoiar proxectos de investigación ligados á COVID-19 e ás medidas innovadoras para pórlle freo e incrementar a seguridade da poboación. En concreto, esta convocatoria, dotada con 3 millóns de euros susceptibles de co-financiamento a través de fondos FEDER, está destinada a “recuperar e apoiar aqueles proxectos de investigación galegos que se presentaron á convocatoria de expresións de interese do Instituto de Salud Carlos III (ISCIII)”. A través desta convocatoria do ISCIII, que recibiu máis de 1.400 expresións, sete proxectos galegos recibiron fondos e preto doutra vintena foron avaliados de xeito favorable, sen obter financiamento. Agora, o programa da Xunta busca apoiar estes proxectos de “alto nivel e calidade científica”.
Os beneficiarios destas axudas serán organismos de investigación do Sistema Galego de I+D+i, públicos ou privados. Na selección das iniciativas, que se poderán desenvolver ata setembro de 2022, terase en conta “a súa excelencia científico-técnica, a súa implementación e o seu impacto”. GAIN engade que “a intensidade da axuda é do 100%, prevendo pagamentos anticipados de ata a totalidade da axuda en cada anualidade e o prazo de presentación de solicitudes remata o 24 de setembro”.
A liña de axudas enmárcase nas medidas impulsadas pola Consellería de Economía, Emprego e Industria, a través da Axencia Galega de Innovación (GAIN), para dar resposta á crise sanitaria e que inclúe actuacións como o apoio a oito solucións innovadoras de pemes e universidades galegas transferibles ao sector da saúde, a industria e o comercio; a nova aceleradora de pemes innovadoras especializada na comercialización de solucións fronte á COVID-19, Connect-19, ou a celebración do primeiro hackaton virtual en xuño para desenvolver solucións innovadoras que axuden ao tecido empresarial galego a adaptarse á nova realidade.