Remata o prazo para presentar contribucións ás axudas da Cátedra Feminismos 4.0

A Universidade de Vigo informou de que remata o prazo para solicitar as axudas de investigación da Cátedra Feminismos 4.0, impulsadas pola institución académica e a Deputación de Pontevedra co obxectivo de fomentar o coñecemento no ámbito da sociedade dixital en estudos de xénero. A convocatoria, que finaliza este venres 4 de setembro, quere contribuír a reducir o desequilibrio entre homes e mulleres dedicados á investigación no sistema universitario de Galicia. A contía das subvencións será de como máximo de 6.000€ por cada proxecto.
Os proxectos que se presenten poderán versar sobre a investigación de forma xenérica sobre temas e perspectivas epistemolóxicas e metodolóxicas feministas sobre a cultura e a sociedade dixital en torno aos contidos abordados nas titulacións impartidas nos Campus de Pontevedra ou Vigo e debe concretarse en temas como deseño de aplicacións ou videoxogos con perspectiva de xénero ou feminista; cibersororidade; analítica dixital e implicacións éticas da Intelixencia Artificial; o androcentrismo dos algoritmos e a perspectiva de xénero na web; os imaxinarios de xénero e o universo simbólico da Rede; internet con perspectiva de xénero; o xénero nas redes sociais; o ciberactivismo feminista; as violencias de xénero nas redes; a arqueoloxía dixital; a agronomía dixital; arte e deseño dixital; o hacker ético e feminista; a historia das científicas e programadoras ou as mulleres nas STEM.
Poderán participar nesta convocatoria os grupos de investigación que conten cun docente ou investigador doutor ou doutora a tempo completo como investigador principal, con vinculación laboral á Universidade de Vigo durante o período de execución do proxecto de investigación, sendo o seu destino os Campus de Vigo ou Pontevedra, así como o persoal investigador doutor con adscrición a un grupo de investigación da UVigo e que acrediten vinculación laboral coa Universidade de Vigo durante o período de execución do proxecto de investigación, sendo o seu destino algún dos campus universitarios da UVigo situados na provincia de Pontevedra.