Ferrol xa vende online experiencias de turismo activo

A Sociedade Mixta de Turismo de Ferrol puxo en marcha, dende mediados de agosto, unha iniciativa innovadora para mellorar ao máximo as estadías das e dos visitantes na cidade e máis na súa contorna. En concreto, trátase dun servizo de venda online de experiencias de turismo activo e visitas guiadas, directamente encamiñadas a mostrar “os segredos mellor gardados de Ferrol, as súas xoias modernistas, as historias das mulleres que deixaron pegada nesta cidade ou como se vivía nunha fortaleza militar do século XVIII”, en palabras da Sociedade Mixta, que suma a estas propostas a posibilidade de “sucar en veleiro as augas tranquilas da ría de Ferrol, alugar bicicletas para facer rutas coa familia ou iniciarse no surf nos areais da costa ferrolá”.
O servizo, unha innovadora contribución aos viaxeiros para a tempada de outono e inverno, está dispoñible no portal turístico local, dende onde se fai venda directa online de visitas guiadas culturais e actividades deportivas.
Este proxecto de comercialización online de parte da oferta turística cultural e deportiva de Ferrol, xorde no marco da subvención da Deputación da Coruña destinada á Mellora da Calidade, Competitividade e Actividades Turísticas para entes e organismos xestores de turismo da provincia en 2020. O obxectivo non é outro que axudar ás empresas turísticas de Ferrol a “dar maior visibilidade aos seus servizos turísticos e ofrecerlles unha nova canle de vendas, sen comisións, nestes tempos tan duros para o sector debido á pandemia da COVID-19”.
Así, desde a Sociedade Mixta de Turismo contactouse con provedores locais de servizos turísticos para brindarlles a oportunidade de dispor gratuitamente desta nova canle de comercialización da oferta turística de Ferrol, sendo a propia Sociedade de Turismo quen asuma, polo menos inicialmente ata final de ano, os custos de intermediación e posta en marcha do motor de reservas.
Para os próximos meses a web oficial de turismo de Ferrol oferta novos itinerarios guiados como Ferrol en Feminino, Ferrol Modernista, Ferrol Secreto e Castelo de San Felipe?, en grupos reducidos e con todas as medidas de seguridade fronte á COVID-19 que marca o protocolo de turismo da Xunta de Galicia. Nas próximas pontes do Pilar e da Constitución ampliaranse os servizos, atendendo tamén á demanda que se vaia producindo.