Este xoves arrinca en Vigo o congreso Utopía Noroeste

Este xoves arrinca en Vigo un dos grandes eventos tecnolóxicos da tempada no ámbito estatal: Utopía Noroeste, un encontro mixto (presencial e virtual) que propón facer fronte común ante as posibilidades (moitas e variadas) que nos brindan as tecnoloxías, a innovación e a ciencia para mitigar as consecuencias da COVID, combater a crise económica e sanitaria e mesmo recuperarnos dela. No congreso, aberto ao público e gratuíto, poderemos escoitar en directo (a través do formato streaming) a algúns dos maiores expertos estatais en Realidade Virtual, Intelixencia Artificial, 5G, videoxogos, nómades dixitais e Cidades Intelixentes.
“Estas xornadas”, en palabras da organización, “abren un espazo para reflexionar sobre os desafíos éticos e políticos que expoñen todos estes cambios e como poden combinarse nun gran reseteo da sociedade desde unhas bases sustentables”.
A xornada inaugural do congreso celébrase este xoves no Museo do Mar de Galicia, e arrincará cunha intervención sobre sistemas IA da man de José María Lassalle, doutor en Dereito e ex-secretario de Estado de Cultura e de Axenda Dixital, que plasmou no seu recente ensaio Ciberleviatán as súas reflexións. Lonxe de abrazar a tecnoloxía de modo incondicional, Lassalle cuestiona a nova orde que se está impondo e como, sen un pacto que aborde os dereitos dixitais e a propiedade dos datos, pode desembocar nunha perda de dereitos.
Tamén haberá espazo para a reflexión sobre a innovación nos contidos dixitais, da man de Adriana Moscoso. A directora xeral de Industrias Culturais, Propiedade Intelectual e Cooperación do Ministerio de Cultura presentará as liñas e estratexias deste departamento estatal e como se expón no seu ámbito de actuación o futuro dos contidos dixitais.

Manuel Baltar, presidente da Deputación de Ourense achegará a súa visión de Ourense como provincia intelixente. Trátase, avanzou, “dunha aposta por basear o desenvolvemento nuns servizos que vaian de abaixo a arriba”, isto é, “partindo de pequenas poboacións, do rural, vilas, cidades, provincias… e seguir ampliando en círculos concéntricos baseados nas necesidades das persoas, dos núcleos de poboación; un novo modelo no que as persoas sexan a prioridade”.
Jaime García Cantero, director de contidos do Foro Retina (El País), pechará esta xornada de debate cunha charla sobre as tendencias tecnolóxicas que veñen. O broche musical porao a nova compositora viguesa Max.