San Sadurniño distribuirá un almanaque elaborado con algoritmos de Intelixencia Artificial

O Concello de San Sadurniño anunciou que agasallará á veciñanza un almanaque que reflectirá polo miúdo o día a día das e dos residentes neste ano marcado pola pandemia e as restricións. Segundo informou o Goberno local, un dos grandes puntais da iniciativa reside na súa vertente tecnolóxica: as diferentes imaxes cotiás que integran o almanaque foron convertidas en lenzos ao estilo de Vang Gogh mediante algoritmos de Intelixencia Artificial. O álbum vén cunha tirada de 500 exemplares. A idea é repetir a experiencia do ano pasado, que, segundo informa o Concello, tivo unha gran acollida.
Na edición de 2021 repásanse mes a mes algunhas das imaxes que “nos deixou o ano a piques de rematar e que se publicaron nos medios municipais”, ou sexa, instantáneas do confinamento, da volta á normalidade, da actividade municipal adaptada á situación sanitaria, etc. O nexo común de todas as fotografías tratadas é a mensaxe positiva que alicerza todo o conxunto e os seus elementos: “Unha mensaxe de esperanza e de confianza en que todo poida volver ao seu o antes posible”, en palabras do Concello.
As persoas encargadas da edición foron o fotógrafo César Galdo e o deseñador Juanlu Fernández. Para a súa elaboración, encargóuselles “que plasmasen recordos vivos dun ano que quedará marcado para sempre na historia e na nosa cabeza”. Por iso todas as imaxes, malia ser fotos, simulan un lenzo pintado ao óleo que reproduciu mediante algoritmos de Intelixencia Artificial o estilo pictórico de Van Gogh.
Segundo explica a concelleira de Cultura, Amparo Calvo, “o tratamento dixital sobre cada imaxe achega un resultado sempre distinto e aleatorio, igual que se o cadro estivese feito á man. É incrible o que fai a Intelixencia Artificial aplicada á imaxe, pero tamén dá un pouco de medo. Dá que pensar e que reflexionar sobre os límites desta tecnoloxía que xa está entre nós”, comenta Amparo Calvo.
O almanaque poderá recollerse a partir do 15 de decembro na Casa da Cultura e na Casa do Concello ata esgotar os 500 exemplares que se van imprimir para repartilos totalmente de balde.