Bota a andar a versión personalizada da app móbil USC Deportes

O Servizo de Deportes da USC vén de impulsar unha versión personalizada da aplicación móbil USC Deportes, dispoñible para persoas usuarias maiores de 14 anos cunha matrícula activa nas súas escolas físico deportivas. Esta ferramenta está deseñada para poder consultar e seguir, “cada quen ao seu ritmo e á carta”, un repositorio de clases virtuais que estará ao alcance dos interesados de xeito gratuíto da man de profesorado experto e cualificado.
Deste xeito, a USC dá acceso definitivamente á súa aplicación móbil para a actividade deportiva logo dunha fase inicial de probas. Esta é unha proposta que amplía o catálogo de recursos dispoñibles para o conxunto da comunidade universitaria ao tempo que propón novas ferramentas para afrontar a actual situación, achegando alternativas que axuden a continuar coa programación de actividades con independencia das circunstancias socio-sanitarias.
A app está a disposición das e dos deportistas a través do repositorio de aplicacións da USC.