Santiago xunta nunha web todas as iniciativas para facer unha cidade máis limpa e sustentable

A concelleira de Medio Ambiente de Santiago, Mila Castro, presentou este 25 de agosto, no Parque de Galeras, a nova imaxe e a web do servizo de limpeza viaria, a páxina santiagosostible.gal, nas súas palabras “un punto de encontro da cidadanía co servizo”. Este espazo, dixo, servirá para facer máis accesible a información e simplificar certos trámites, como por exemplo a solicitude de composteiros, “e permitirá tamén achegar dúbidas e suxestións ou contactar co servizo de recollida de voluminosos a domicilio, entre outros”.
Segundo informou, Santiago Sostible será “a marca paraugas” para todas as iniciativas relativas ao servizo de limpeza viaria e recollida de lixo, un servizo de grandes dimensións que leva aparellado o cambio de 2000 colectores e a incorporación paulatina ata mediados de 2023 de 22 camións cero emisións, que funcionan a gas natural, 17 deles recolectores.
A concelleira sinalou que desde a web Santiago Sostible tamén se informará dos diferentes xeitos de participar no novo plan de xestión de materia orgánica que xa está en marcha por medio da compostaxe (individual e comunitaria), pero que será no mes de setembro coa instalación dos primeiros colectores de orgánica cando se informará ás familias de como poder participar.