A Cámara de Santiago e Javier Rocamora mostran como atraer visitantes á nosa web

Co inicio do novo ano a Cámara de Comercio de Santiago segue coas súas actividades de formación tecnolóxica para as empresas e as persoas autónomas e profesionais da contorna compostelá. Este 20 de xaneiro, sen ir máis lonxe, a entidade cameral achega unha nova sesión co prestixioso formador Javier Rocamora, que mostrará aos asistentes como ter un sitio web atractivo para os seus clientes. Será o venres 20 en horario de 10.00 a 11.15 horas. A cita incluirá a presentación da Oficina Acelera PEME da entidade cameral, co-impulsada pola entidade estatal Red.es.
Os contidos da xornada son os seguintes: a páxina de inicio dunha web como escaparate dunha empresa, as vantaxes da simplicidade (menos é máis), os beneficios dun deseño adaptable a múltiples dispositivos, en que consiste un mapa de calor web (zonas frías e quentes) e como conseguir menús efectivos. Tamén se amosará aos asistentes como artellar e ordenar os contidos dunha web, como establecer chamadas de atención e como empregar páxinas complementarias.
O relator será Javier Rocamora García, consultor autónomo especializado e con dilatada experiencia en mercadotecnia dixital, xestión de redes sociais e comercio electrónico desde 2008, operando baixo a marca comercial Las 3 en Punto.
Esta xornada está organizada pola Oficina Acelera PEME da Cámara de Comercio de Santiago de Compostela que se inclúe en Programa Operativo Plurirrexional de España FEDER 2014-2020 (POPE), co-financiado polo Fondo Europeo de Desenvolvemento Rexional (FEDER) e pola entidade pública empresarial Red.es (Secretaría de Estado de Dixitalización e Intelixencia Artificial).