Correos informou de que xa é posible solicitar o voto por correo para as eleccións autonómicas e municipais que se celebrarán o domingo, 28 de maio de 2023, de acordo coa convocatoria publicada na data deste martes 4 de abril. Desta maneira, os electores que decidan votar por correo poden solicitalo ata o 18 de maio (inclusive) nas oficinas de Correos ou vía web, precisando neste caso certificado dixital ou DNI electrónico, así como ter instalado no seu ordenador a aplicación AutoFirma.
En caso de ser aceptada a solicitude pola Oficina do Censo Electoral, o cidadán recibirá a documentación de voto por correo no enderezo que indicase na solicitude.
Solicitude de voto en oficinas
A solicitude de voto por correo pode realizarse en todas as oficinas de Correos de España. Esta petición debe ser realizada persoalmente por cada elector, salvo en caso de enfermidade ou discapacidade (acreditada mediante certificación médica oficial) que lle impida a formulación persoal da devandita petición. Neste caso pode ser presentada en nome do elector por outra persoa autorizada notarialmente ou consularmente.
No momento de formular a solicitude, os interesados deben acreditar a súa personalidade presentando ante o empregado da oficina postal o DNI, Pasaporte ou carné de conducir orixinais.
Co obxectivo de axilizar os trámites e evitar esperas, a compañía ofrece a opción de cita previa para a solicitude do voto en oficinas, a través da aplicación móbil de Correos, a súa web ou a Oficina Virtual. Para iso o elector debe seleccionar a oficina dispoñible que teña cita previa e, por último, elixir o día e a hora que máis lle conveña.
Correos entregará as solicitudes recibidas nas Delegacións Provinciais da Oficina do Censo Electoral, quen enviará aos solicitantes, a partir do 8 de maio, a documentación necesaria para que poidan exercer o voto por correo.
O prazo de depósito do voto por correo finalizará o 24 de maio de 2023.
