Ineo dá soporte a preto dun milleiro de autónomos e empresas nos seus procesos de dixitalización

A asociación galega de empresas tecnolóxicas Ineo presentou os detalles do seu informe da actividade da súa Oficina Acelera PEME, posta en marcha de maneira conxunta coa entidade estatal Red.es. Ineo fixo un “balance moi positivo” dos dous anos de andaina desta actividade formativa, capacitadora, innovadora e transformadora, actividada en maio de 2021 coa colaboración da Confederación Empresarial de Ourense (CEO), a Confederación de Empresarios de Pontevedra (CEP), a Asociación Galega de Emprendedores (AGAEMP), a Asociación Empresarial de Profesionais e Autónomos de Ourense (AEPA) e o Centro Tecnolóxico Gradiant.
Sedes en Vigo e en Ourense
Durante dous anos, a Oficina Acelera PEME que impulsa INEO e que conta con sedes en Vigo e Ourense, deu soporte a 911 empresas e persoas autónomas, sumando os que acudiron a algún obradoro ou xornada e os que recibiron asesoramento directo e individualizado, que ascenden a 409. Desde maio de 2021, a entidade tamén organizou un total de 56 talleres relacionados coa dixitalización, aos que asistiron máis de 1.600 persoas. Todas estas accións frutificaron en máis de cen axudas á dixitalización tramitadas para pemes e autónomos de Galicia.
A presentación
A sede da Oficina Acelera Peme de Ineo en Ourense, sita na Confederación Empresarial de Ourense (CEO), acolleu este martes 2 de maio unha rolda de prensa na que participaron Marisol Nóvoa Rodríguez, presidenta da CEO; David Martínez Alonso, presidente da Asociación Empresarial de Profesionais e Autónomos de Ourense; e Luis Rey Fernández-Arruty, director de operacións de Ineo.
Marisol Nóvoa destacou ao comezo que ‘a colaboración é un piar fundamental na filosofía da CEO por iso estamos abertos sempre a cooperar en iniciativas deste tipo que repercutan no beneficio do tecido empresarial, a súa competitividade e, neste caso, a súa transformación dixital, por eso a proposta hai dous anos desde Ineo para implantar esta oficina xunto coa CEP, a Asociación Galega de Emprendedores, a Asociación Empresarial de Profesionais e Autónomos de Ourense e Gradiant pareceunos un bo inicio para facer chegar a dixitalización ás empresas”.
Pola súa banda, David Martínez lembrou a orixe da colaboración e incidiu en que “a través desta alianza con Ineo puidemos facilitar aos autónomos o coñecemento das vantaxes da dixitalización, non só a xestión, senón tamén outros aspectos descoñecidos por este colectivo; por iso continuaremos con esta cooperación para axudar ao autónomo na cada vez máis necesaria dixitalización”.
A maiores, Luis Rey Fernández-Arruty mostrou a súa satisfacción polos resultados obtidos. “Estamos especialmente orgullosos desta Oficina, primeiro por ser elixidos por Red.es de entre todos os candidatos para poñela e marcha e, segundo, porque nos permitiu, dalgunha forma, axudar a dixitalizar a case mil empresas e autónomos de Galicia”, explicou. Recalcou ademais que este proxecto, está perfectamente aliñado cos obxectivos de Ineo, que naceu, entre outros fins, “para axudar á transferencia de tecnoloxía desde o sector TIC cara a outros ámbitos empresariais”. Amais, aproveitou o acto para agradecer a colaboración das ditas entidades, “xa que os éxitos da Oficina responden o esforzo de todos”.
Fondos de recuperación
Ineo, ademais de despregar unha ampla actividade desde a Oficina Acelera PEME, tamén está a destinar unha especial atención na tracción de Fondos de Recuperación (Next Generation) para o sector das TIC en Galicia. Programas enmarcados dentro destes fondos, como é o caso do Kit Dixital, representan un puntal da actividade de Ineo, cuxo eido de acción xeral pivota ao redor do impulso da competitividade das empresas que a conforman, da representatividade do sector en Galicia, da protección tanto dos dereitos como dos intereses do tecido empresarial tecnolóxico en Galicia e do fomento como axente prescritor da tecnoloxía desenvolvida en Galicia noutros sectores económicos.