Os enxeñeiros en Informática de Asturias reciben o Premio Especial CPEIG

O Colexio Profesional de Enxeñaría en Informática de Galicia (CPEIG) vai entregar o Premio Especial CPEIG ao Colegio Oficial de Ingenieros en Informática del Principado de Asturias (COIIPA) pola “súa contribución para que o Goberno asturiano aprobase a inclusión dos enxeñeiros en informática nos Corpos Especiais da Administración do Principado de Asturias”. O galardón será entregado na Noite da Enxeñaría en Informática de Galicia que organiza o CPEIG.
O pasado 15 de marzo aprobouse o texto do Proxecto de Lei de Emprego Público de Asturias, que recolle “este importante avance para a profesión de Enxeñeiro en Informática”, lembra o CPEIG.
Segundo explica o COIIPA, unha das principais consecuencias é a equiparación, por lei, dos enxeñeiros e enxeñeiras en Informática a outros enxeñeiros dentro da Administración Pública na Comunidade Autónoma de Asturias, en concreto dentro do corpo A/A1. “Esta normativa exemplifica a visión de futuro do Gobierno del Principado de Asturias á hora de modernizar as súas administracións. Dende o COIIPA valoramos moi positivamente os pasos que deron no referido á profesionalización no proceso de dixitalización dos distintos órganos o Gobierno da nosa comunidade”, indica a decana do COIIPA, Irene Cid.

O COIIPA iniciou hai dous anos conversacións co Goberno e cos distintos grupos políticos da Junta General do Principado de Asturias para que esta inclusión na Lei de Emprego Público fose unha realidade, un diálogo que segundo Irene Cid frutificou no texto legal que axiña estará publicado no BOPA.
Cúmprese así unha das principais reivindicacións históricas dos enxeñeiros e enxeñeiras en Informática asturianos. O COIIPA agradece ao Principado de Asturias a súa predisposición, e a todos os colexiados e colexiadas a súa axuda e apoio. “Dentro da nosa profesión felicitámonos por este avance e equiparación. Agradecemos enormemente a predisposición de todos os partidos políticos e da Administración do Principado de Asturias por conseguir incluír aos actores principais do proceso de dixitalización nas distintas leis que conforman o noso Estado de Dereito, para a súa modernización dunha maneira segura e xusta. Aínda queda moito traballo por realizar, pero está nova lei supón un avance importante. Agora mesmo atopámonos estudando, coa asesoría xurídica, as aplicacións prácticas na interpretación desta lei e, desde o COIIPA, velaremos polo seu cumprimento”, manifesta Irene Cid.
A XV Noite da Enxeñaría en Informática de Galicia celebrarase o 16 de xuño no Hotel OCA Puerta del Camino de Santiago e a decana do COIIPA recollerá a distinción. O evento é un punto de encontro entre os colexiadas/os do CPEIG e un gran número de empresas e profesionais TIC de Galicia, que conta cunha destacada participación de cargos empresariais, institucionais e políticos e é un referente para o sector.