Oito proxectos do CITIC son aceptados na convocatoria de Xeración de Coñecemento 2022

Inserida no marco do Programa Estatal para Impulsar la Investigación Científico-Técnica y su Transferencia, dentro do Plan Estatal de Investigación Científica y Técnica y de Innovación 2021-2023 atópase a convocatoria de axudas 2022 a Proyectos de Generación de Conocimiento e a actuacións para a formación de persoal investigador predoutoral asociadas aos devanditos proxectos. No Centro de Investigación en Tecnoloxías da Información e as Comunicacións (CITIC) foron aceptados oito proxectos para optar ás devanditas axudas, os cales suman máis dun millón trescentos mil euros concedidos para o seu desenvolvemento. O tempo de duración do financiamento para cada proxecto será de 3 a 4 anos, segundo sexa o caso.
Cómpre dicir que estas achegas teñen como finalidade financiar a realización de proxectos de investigación centrados en fomentar a xeración e o avance significativo do coñecemento científico e a investigación de calidade contrastada; amais de impulsar a procura de solucións aos desafíos da sociedade.
Volvendo ao CITIC, na área da Intelixencia Artificial (IA) presentaron traballos Álvaro Barreiro García e Javier Parapar López, José Luis Calvo Rolle e Héctor Quintián Pardo, David Vilares Calvo e por último Margarita Alonso Ramos. No ámbito de Ciencia e Enxeñería de Datos (CID) foron Miguel Ángel Rodríguez Luaces e Susana Ladra González por unha banda, e Carlos Vázquez Cendón pola outra. Na Computación de Altas Prestacións (HPC) presentaron conxuntamente Juan Touriño Domínguez e Gabriel Rodríguez Álvarez; e en Servizos e Redes Intelixentes (SRI) Luís Castedo Rivas e José A. García Naya.