La Odisea (The Odyssey), o último filme de Christopher Nolan, foi obxecto dunha filtración durante a fin de semana, cando unha copia de alta calidade apareceu publicada na rede social X e chegou a acumular millóns de reproducións antes de ser retirada.
O estudio Universal reaccionou de inmediato activando os seus protocolos contra a distribución non autorizada da película. Nun comunicado remitido a Deadline, indicou que «tivemos constancia da publicación non autorizada da película e iniciamos inmediatamente os protocolos de retirada. Tomamos moi en serio as infraccións dos dereitos de autor e emprenderemos todas as accións oportunas para protexer os nosos contidos e os nosos dereitos de propiedade intelectual».
Aínda que a eliminación deste tipo de contidos en X adoita resultar complexa, ao longo do domingo a meirande parte das copias xa desapareceran da plataforma.
Christopher Nolan insistiu nas últimas semanas en que a súa produción foi rodada integramente con cámaras IMAX e recomenda aos espectadores vela neste formato para gozar da experiencia prevista polo director.
A filtración non pareceu afectar ao rendemento comercial do filme, que rexistrou na súa segunda fin de semana nos cines de EE.UU. a mellor marca da carreira de Nolan, cunha recadación de 87 millóns de dólares. Os formatos premium (IMAX, outras salas PLF e as proxeccións en 70 mm) representaron o 57 % da recadación da fin de semana, fronte ao 53 % da estrea.
