YouTube Premium volve subir de prezo en España e outros territorios, segundo está a comunicar Google aos subscritores do servizo. A nova actualización das tarifas que afecta a todas as modalidades do servizo, con incrementos que sitúan o plan Familiar en 29,99 euros mensuais e o individual en 15,99 euros.
Os novos prezos entrarán en vigor na seguinte data de facturación dos usuarios afectados a partir do 23 de setembro de 2026. A subida chega menos de dous anos despois do anterior incremento aplicado en España a finais de 2024.
O plan Premium Lite, que ata agora custaba 7,99 euros ao mes, pasa a 8,99 euros. A modalidade Individual sobe de 13,99 a 15,99 euros, mentres que a Familiar aumenta de 25,99 a 29,99 euros. O plan para estudantes tamén se encarece, pasando de 8,99 a 10,49 euros mensuais.
| Plan | Prezo anterior | Novo prezo |
|---|---|---|
| Premium Lite | 7,99 € | 8,99 € |
| Premium Individual | 13,99 € | 15,99 € |
| Premium Familiar | 25,99 € | 29,99 € |
| Premium Estudante | 8,99 € | 10,49 € |
O incremento é especialmente significativo no plan Familiar. En novembro de 2024 pasara de 17,99 a 25,99 euros mensuais, polo que a nova tarifa de 29,99 euros representa un aumento de 12 euros ao mes respecto do prezo que tiña hai menos de dous anos. Para unha subscrición mantida durante doce meses, son 144 euros máis ao ano que coa tarifa de 17,99 euros.
A diferenza tamén se aprecia no plan Individual, que pasa de 13,99 a 15,99 euros. Os usuarios que contraten a subscrición a través de Apple terán unha tarifa diferente, de 20,99 euros mensuais, cinco euros máis que o prezo contratado directamente con YouTube.
Google xustifica habitualmente estas revisións de prezos pola evolución do servizo e polo apoio aos creadores de contido. O novo incremento en España forma parte dunha subida internacional que tamén está a afectar a outros mercados, con aumentos que nalgúns casos se sitúan arredor do 10-15 %.
O encarecemento do plan Familiar chega ademais nun momento no que YouTube está reforzando as comprobacións sobre os grupos familiares. A modalidade permite ao administrador engadir ata cinco membros, pero estes deben formar parte do mesmo fogar. As comprobacións para detectar grupos nos que os integrantes viven en domicilios diferentes dificultan así o uso da subscrición como fórmula para compartir os gastos entre amigos.
O novo prezo de 29,99 euros permite manter seis integrantes dentro dun mesmo grupo familiar, polo que o custo teórico sería de aproximadamente cinco euros por persoa ao mes se se divide a mensualidade entre todos. Esta fórmula, porén, está condicionada aos requisitos de domicilio establecidos para os plans familiares.
Quen non queira asumir a nova tarifa dispón de Premium Lite como alternativa máis económica. Por 8,99 euros mensuais ofrece unha experiencia con menos publicidade, aínda que non incorpora todas as vantaxes de Premium. Entre as principais diferenzas está a ausencia do acceso completo a YouTube Music, unha prestación especialmente relevante para quen emprega a subscrición como alternativa a servizos de música en streaming.
A evolución dos prezos tamén sitúa YouTube Premium cada vez máis lonxe das tarifas que tiña en España antes da primeira gran revisión de 2024. No caso do plan Familiar, os 17,99 euros iniciais quedaron atrás cunha subida acumulada do 67 % ata os 29,99 euros actuais.
