WordPress Coruña celebrará o vindeiro 19 de novembro unha nova sesión centrada nas estratexias de venda e na automatización do márketing dixital. A xornada contará coa participación de Alba González Maneiro, consultora de estratexia e visibilidade especializada en axudar os pequenos negocios a mellorar os seus resultados comerciais.
A charla, titulada Sen conversa non hai conversión: como vender sen estar presente, terá lugar ás 19:30 horas en WekCo, no número 2 de Novo Mesoiro, na Coruña. A sesión abordará como manter conversas con potenciais clientes e transformalas en vendas sen necesidade de intervir persoalmente en cada interacción.
González Maneiro traballa con pequenos negocios aos que axuda a organizar o seu márketing, desenvolver campañas publicitarias rendibles e crear ofertas comerciais atractivas. Para iso, desenvolveu unha ferramenta que centraliza tarefas de márketing e combina a automatización con estratexias de publicidade dixital.
A consultora afirma ter vendido máis de 1.000 ofertas dixitais, a maioría delas de maneira automatizada, mediante un sistema que busca captar clientes e xerar conversións sen requirir unha intervención constante.
Ao remate da sesión, os asistentes poderán participar nun encontro de networking acompañado de petiscos e bebidas. Para a xestión da capacidade do local onde ten lugar o encontro prégase aos interesados en acudir que se inscriban previamente a esta actividade.
