Un accesorio quere engadir son sen fíos á Nintendo Switch

Pese a que a Nintendo Switch conta con conectividade Bluetooth 4.1, para a reprodución de son emprega unha toma de auriculares (ou a súa saída HDMI se temos a consola conectada ao televisor), o que non convence a moitos amantes dos auriculares sen fíos, de aí que chegue a Kickstarter un proxecto para financiar GENKI, un accesorio que conectado á toma USB-C da consola de Nintendo permite a súa conexión con auriculares Bluetooth 5 e inferiores, empregando o codificador de baixa latencia aptX (de xeito que o retardo do son sería de só 60 milisegundos, o que sería practicamente imperceptible).
Esta solución, ao conectarse por USB-C non precisa de batería interna (xa que toma a corrente do propio porto) e incluso permite conectar un par de auriculares á vez (pensando en experiencias para dous xogadores), podendo situarse os auriculares ata a 20 metros de distancia da consola.
Este dispositivo pode adquirirse por 39 dólares (uns 33 euros) aínda que non se remitirá aos seus mecenas ata o mes de outubro, aínda que o produto corre o risco doutros proxectos de micromecenado semellantes: ter que competir con produtos semellantes comercializados dende China (de feito, xa están á venda dispositivos semellantes a un prezo moi inferior).