O ITG quere revolucionar o motor cun novo sistema de xestión enerxética smart

O Instituto Tecnolóxico de Galicia deu a coñecer hoxe as potencialidades do programa de xestión de recursos Auto-Enerxía 4.0, que bota man de novas tecnoloxías da información para dixitalizar a enerxía e permitir dispoñer de ferramentas que leven a cabo un seguimento e un control eficiente. O sistema de xestión, con grandes posibilidades para sectores como o do motor, foi dado a coñecer na asemblea xeral de CEAGA (Clúster de Empresas de Automoción de Galicia) por Santiago Rodríguez Charlón, director da División de Enerxía do ITG.
O obxectivo do instituto ao desenvolver esta tecnoloxía e presentala perante a industria do motor foi responder ás necesidades concretas de doce das empresas que conforman CEAGA, e achegar solucións personalizadas a cada unha delas para que se poidan extrapolar a outras empresas do sector. Algunhas das medidas específicas propostas redundaron nun aforro enerxético de ata o 5% no total do consumo da planta de produción.

Santiago Rodríguez fixo saber que Auto-Enerxía 4.0 fai seguimento en tempo real dos consumos e dos parámetros enerxéticos e de procesos en fábrica. Para iso, baséase en Flythings, a solución IoT (Internet das Cousas) creada por ITG atender as demandas da Industria 4.0, e que permite almacenar, controlar e dar valor a millóns de datos transmitidos en tempo real por múltiples dispositivos de sensorización. Asemade, o ITG lembra que Flythings tamén é viable para impulsar técnicas de analítica preditiva ou de análise intelixente da información.