O ITG recunca no campionato de surf de Pantín coa súa máis avanzada tecnoloxía carrexable

Instituto Tecnolóxico de Galicia (ITG) é, por segundo ano, colaborador tecnolóxico do campionato internacional de surf, ABANCA Galicia Classic Surf Pro, que se celebra en augas de Pantín do 28 de agosto ao 7 de setembro. O ITG achega á competición a última evolución da súa tecnoloxía FlyThings, que consta dun dispositivo hardware (cun peso de 90 grs e unhas dimensións de 10 x 5cm) e un software que ilustra sobre o sinal de TV os valores que alcanza o deportista en cada unha das súas manobras. Nesta edición, informa o centro tecnolóxico galego, a solución é máis evolucionada aínda cá empregada en 2017, “dando resposta ás propostas de mellora dos surfeiros, xuíces e organizadores”.
Entre as novidades da versión presentada inclúense melloras como a integración do dispositivo na licra dos competidores (na edición anterior o dispositivo estaba integrado na táboa); a detección automática do inicio da onda por parte do surfeiro, así como dos seus movementos; a transmisión en tempo real dos datos rexistrados ou a creación dunha aplicación móbil gratuíta para recibir os datos nos dispositivos móbiles dos asistentes.
Segundo Santiago Rodríguez Charlón, directivo do ITG, “a solución que presentamos neste campionato mellora a presentada en 2017 porque continuamos traballando con todas as partes involucradas no mundo do surf e tamén noutros deportes acuáticos”. En termos máis concretos, pon en xogo máis datos, mellores comunicacións, procesado automático e “unha presentación máis visual para o espectador”.
A través dunha rede sen fíos de comunicación radio, FlyThings é quen de medir a velocidade do surfeiro (instantánea, media e máxima), a distancia percorrida (instantánea e total), a forza G coa que se realiza cada xiro ou manobra, a velocidade de rotación coa que se fai cada xiro ou movemento, o número de ondas surfeadas e o número de manobras realizadas. Así mesmo, ao finalizar o percorrido na onda, elabora un resumo dos valores medidos.
O ITG sinala tamén que se trata dunha solución totalmente automatizada (non require control por parte de persoal técnico) e poderase visualizar a través dunha aplicación móbil específica que estará operativa durante a competición e a través do sinal de televisión propia do campionato.
Unha vez finalizada a manga, a ferramenta fai unha comparativa entre os diferentes competidores, engadindo aos valores devanditos e o número de ondas e de manobras totais. “Todo iso co fin de valorar, de forma obxectiva, o esforzo, a habilidade e a destreza dos deportistas”, engade o ITG.