Unha manchea de entidades e empresas TIC galegas participarán no congreso de ISACA en Santiago

O vindeiro 18 de setembro, a entidade internacional ISACA (Asociación de Auditoría e Control de Sistemas de Información) organiza o I Congreso de ISACA en Santiago de Compostela no que participan entidades como o Colexio Oficial de Enxeñeiros en Telecomunicación de Galicia (o COETG), ou o Colexio Profesional de Enxeñaría en Informática de Galicia (CPEIG) entre outros representantes (empresas, institucións, asociacións, profesionais) do tecido TIC do noroeste estatal. Na cita porase o foco nos ámbitos das auditorías tecnolóxicas, a ciberseguridade, os riscos TIC ou o goberno dixital, entre outros eidos de actuación.
Será unha xornada composta por relatorios e mesas redondas cos mellores expertos en cada área, sempre “baixo un enfoque práctico e casos de éxito”, informa ISACA, engadindo que o obxectivo é “conseguir un intercambio de coñecemento esencial e necesario neste tipo de xornadas, na que tamén terá cabida o networking”.
Fernando Suárez, presidente do CPEIG, e Julio Sánchez Agrelo, decano do COETG, participarán como relatores na mesa redonda A formación e os profesionais en Galicia.
O evento terá lugar na Cidade da Cultura de Galicia e calcúlase que concorrerán uns cen expertos nas devanditas temáticas TIC. Por empresas, centros tecnolóxicos e institucións, estarán presentes (entre outras moitas) Gradiant, Abanca, R, Coren, Pintos & Salgado Abogados, o CiTIUS, o CPEIG, o COETG, Emetel, Improsec ou Tegra (Gradiant). Entre os patrocinadores atópanse firmas referenciais galegas como Dinahosting.
A inauguración está prevista para as 10.00 horas, no Centro de Innovación Cultura do Gaiás. O acto de benvida correrá a cargo de Ricardo Barrasa, presidente de ISACA Madrid. A continuación virá unha mesa redonda sobre ciberseguridade e logo, sobre as 12.00, outra xeira de debate sobre riscos TIC no sector industrial.