O Concello de Lugo achegará 300 computadores para facer avanzar a eAdministración

O Concello de Lugo vén de aprobar en xunta de Goberno a saída a concurso do fornecemento de 300 computadores para o proceso de implantación local da Administración Electrónica. A iniciativa, segundo fixo saber a alcaldesa Lara Méndez, vai dirixida a renovar os equipos actualmente existentes e seguir traballando, deste xeito, na transformación da cidade nunha Smart City onde a práctica totalidade das comunicacións e tramitacións poidan realizarse pola vía telemática.
En palabras do Concello, búscase que “as traballadoras e traballadores municipais poidan gañar rapidez e comodidade e dar un mellor servizo ós veciños e veciñas de Lugo á hora de resolver as súas xestións”.
A suma da adquisición destes equipos é por valor de 319.712,25€. O contrato abranguerá o subministro, configuración e instalación dos equipos. Amais, estipúlase no proxecto que os sistemas ofertados sexan “conformes coa normativa vixente autonómica, estatal e comunitaria no referente aos aspectos de calidade, ergonómicos, medioambientais, aforro enerxético, compatibilidade electromagnética, redución da radiación emitida e seguridade”.