Lingua rodada convida á xuventude a facer voar o seu talento audiovisual e apostar polo galego

O talento da nosa xuventude pide paso e non só hai que permitir que se exprese, cómpre poñer en xogo todos os recursos posibles para materializalo e impulsalo. Disto tratan certames como Lingua de namorar ou, agora tamén, Lingua rodada, ambos os dous postos en marcha pola Secretaría Xeral de Política Lingüística. O seu máximo responsable, Valentín García, presentou hoxe no Pazo de San Roque (Santiago) os detalles de Lingua rodada, un novo programa de dinamización do galego que aposta de cheo pola confluencia entre dispositivos móbiles, creatividade xuvenil e talento audiovisual.
A iniciativa, que se vai desenvolver entre xaneiro e maio deste ano, incide no que sería, en palabras do secretario, “a alfabetización audiovisual en galego entre a mocidade a través dos soportes e canles nos que os rapaces e rapazas se moven habitualmente”. Ou sexa, os dispositivos móbiles e as tabletas, principalmente. Así mesmo, engadiu o secretario xeral, “queremos que sirva de espazo e plataforma de expresión para aqueles mozos e mozas que teñen ideas e ganas de contalas na nosa lingua e que poden ser semente de futuro para o cine galego, porque, como dixo Chano Piñeiro, a quen lle queremos render homenaxe con este proxecto, pódese facer cinema en Galicia e facelo en galego é necesario”.
Xunto co secretario xeral, participou na presentación Rubén Riós, actor e director da produtora Claqueta Coqueta, que xestionará o proxecto.
No acto tamén se fixo saber que Lingua rodada consiste nun certame de microrrelatos levados á imaxe por medio de pequenos vídeos realizados co teléfono móbil por rapaces e rapazas que teñan entre os 12 e os 17 anos e cursen ESO, primeiro de Bacharelato, Formación Profesional básica, ciclos formativos de grao medio ou ensinanzas especiais en centros de titularidade da Xunta.
Nas bases do certame tamén se especifica que as autoras e autores das tres curtas preseleccionadas participarán nun obradoiro impartido por un especialista do sector audiovisual que lles permitirá mellorar a súa proposta. Pola súa banda, os creadores do vídeo que resulte finalmente gañador participarán nunha estadía rural de dous días durante a que rodarán o seu vídeo-relato cun equipo de profesionais do audiovisual ao seu cargo e posteriormente asistirán á XVII edición do Festival de Cans, onde terán ocasión de presentar o seu traballo.
Valentín García lembrou que o prazo para que os centros educativos soliciten a súa participación no programa abrangue do 10 de xaneiro ao 3 de febreiro de 2020 e o prazo de envío dos vídeo-relatos, do 4 de febreiro ao 4 de marzo. As bases completas poden consultarse no Portal da Lingua Galega.