A renovación trimestral da demanda de emprego pode tramitarse vía web

O Goberno galego informou estes días de que a renovación trimestral da demanda de emprego que viña dándose de xeito automático nos últimos meses por mor da pandemia xa pode facerse en liña, a través da aplicación MOBEM, no propio Portal de Emprego de Galicia o ben do 012. Nestes dous últimos casos trátase de “achegar mecanismos sinxelos e áxiles de tramitación” para os que só é preciso dispor de DNI ou NIE e dun PIN que facilitará a Xunta ás persoas usuarias.
A Administración autonómica iniciou na recta final de 2020 os contactos cos usuarios do Servizo Público de Emprego -por correo electrónico e a través de mensaxería móbil- e puxo avisos en todas as súas dependencias para dar conta das novidades.
Para garantir “un axeitado control de aforo e acceso” e “organizar adecuadamente os servizos á cidadanía” a atención presencial seguirá a realizarse exclusivamente a través do sistema de cita previa. Deste xeito, pode solicitarse, como ata o de agora, con 24 horas de antelación e por calquera persoa interesada, a través do Portal de Emprego Galicia ou do servizo de atención telefónica 012.