Intel presenta os seus procesadores de escritorio de nova xeración

Os procesadores Intel Core de 12ª xeración chegan aos equipos de sobremesa, enfocándose claramente no mercado do gaming, para ofrecer a mellor experiencia posible aos amantes dos videoxogos máis esixentes, chegando estes novos chips ao mercado a partir do 4 de novembro, cun total de 6 procesadores que tiran proveito da memoria DDR5 (de ata 4.800 MT/s) e a conectividade PCIe 5.0 (ata 16 pistas) para conseguir grandes experiencias en xogos ou na creación de contidos.
O procesador insignia dos que chegarán ao mercado sería o Intel Core i9-12900K, que podería funcionar ata a 5,2 GHz e contaría con 16 núcleos e 24 fíos, levando a potencia de equipos de escritorio ao límite. Este procesador fronte aos da anterior xeración melloraría o seu rendemento aproximadamente un 25% en xogos, un 36% en edición fotográfica, un 32% en edición de vídeo e un 37% en modelado 3D; mentres que a tecnoloxía Intel Killer Wi-Fi 6E permitiría reducir a latencia ata un 75%.
Estes novos procesadores terán prezos de entre 264 e 589 dólares (en función do modelo en concreto) e comezarán a súa distribución en novembro, confiando Intel en poder entregar centos de milleiros de unidades antes de rematar o ano e máis de 2 millóns de unidades antes do remate de marzo de 2022.