GAIN prepara a V edición do Encontro de Deseño para a Innovación Empresarial en Galicia

Dende GAIN anuncian a data para a celebración do Encontro de Deseño para a Innovación Empresarial en Galicia, será o 29 de xuño no CIS Tecnoloxía e Deseño de Ferrol. Emporiso, o formato deste evento será híbrido presencial-virtual para conmemorar, por quinto ano consecutivo, o Día Mundial do Deseño Industrial.
A finalidade desta xuntanza é levar ás pemes galegas o potencial do deseño como recurso estratéxico para a innovación sostible e a competitividade.
Así, as persoas participantes terán acceso a unha visión práctica e aplicada a través da presentación de varios casos de éxito. Trátase das experiencias de empresas galegas que xa están a desenvolver proxectos grazas ao apoio do Programa Deseña PEME da Xunta de Galicia, que ten como obxectivo axudar a incorporar o deseño nas empresas galegas e poñer en valor a figura do profesional do deseño como elemento transformador.
Indo ao miolo do encontro, dicir que contará con tres enfoques diferentes celebrándose tres mesas redondas nas que as pequenas e medianas empresas serán protagonistas: Futuro dixital e desenvolvemento sustentable- Star Electrónica e MRF. O rural como motor empresarial e de innovación- A-vida by Idoia Cuesta e Granja Campomayor. Economía circular e creativa- Veigas de Sabugueiro e Calor Color.
A visión empresarial completarase co relatorio de Carlota Corzo (co-fundadora de Lázzaro) que tratará sobre a transparencia, a seguridade e a rastrexabilidade a través do deseño dixital.
O Encontro de Deseño para a Innovación Empresarial en Galicia vai encamiñado a representantes de PEME e outras entidades interesadas en potenciar o deseño como ferramenta de innovación, competitividade e sustentabilidade. A profesionais do deseño de todas as áreas de especialización (gráfico, estratéxico, de espazos, dixital, de moda, industia e produto). E estudantes de deseño e outras disciplinas relacionadas.