A inauguración da Mobile Week Ourense veu marcada pola candidatura da cidade como sede da AESIA

O Centro Cultural Marcos Valcárcel acolleu este xoves 15, pola mañá, o acto inaugural da Mobile Week Ourense. Participaron o presidente da Deputación, o reitor da UVigo Manuel Reigosa, o coordinador da MWO, Fernando Suárez, e o delegado da Xunta en Ourense, Gabriel Alén. Baltar afirmou que esta segunda edición vén marcada polo reto que supón a candidatura como sede da Axencia Española de Supervisión de Intelixencia Artificial (AESIA).
O primeiro día do evento veu cunha intensa xornada de actividades que tamén abrangueu a Confederación Empresarial de Ourense (CEO) e os xardíns do Padre Feijóo, onde se desenvolveron iniciativas relacionadas coa promoción de marcas, os fondos europeos, o metaverso, a identificación coa administración pública, a dixitalización do rural, a gamificación con Realidade Aumentada ou a simulación de condución.
No mediodía, o salón de actos do Marcos Valcárcel foi o escenario da inauguración oficial da Mobile Week Ourense, que alcanza a súa segunda edición grazas á alianza entre a Deputación de Ourense e a Fundación Mobile World Capital Barcelona.
Manuel Baltar felicitou a Ourense “por ser a única provincia de España que celebra esta iniciativa en coordinación coa Fundación Mobile”, asegurando que se trata “dun feito innovador que marca tendencia e diferencia o noso territorio na era da tecnoloxía”.
Para Manuel Baltar a expresión clave desta proposta é visión de futuro, pero tamén a colaboración “xa que cooperando somos máis e mellores”, agradecendo deste xeito a confianza dos patróns da fundación para celebrar este evento durante tres anos consecutivos en Ourense, así como a implicación dos patrocinadores e colaboradores. Un labor conxunto, dixo, que se traduce “nunha axenda intensísima na que os maiores e os novos van ter a oportunidade de participar nese obxectivo xeral que é achegar a tecnoloxía á veciñanza da man dos expertos”.
Esta segunda edición da Mobile, afirmou, vén marcada pola capacidade de conexión de Ourense coa capital de España grazas á alta velocidade, que cualificou como “un factor diferencial competitivo”. Todo un reto que ten a súa continuación na candidatura como sede da Axencia Española de Supervisión de Intelixencia Artificial (AESIA), “que ten na provincia o lugar ideal por esa capacidade de conexión, pola celebración de eventos como este, pola alianza coa Fundación Mobile ou por acoller o Parque Tecnolóxico de Galicia”.
Entre as charlas programadas nesta primeira xornada, pola mañá destacou a conferencia Unicornios, cisnes negros e rinocerontes grises. Tecnoloxía e innovación para facer un mundo mellor, impartida polo experto Jaime García Cantero no Centro Cultural Marcos Valcárcel. Cantero, xornalista especializado en tecnoloxía, tamén moderou a mesa redonda Acercando a tecnoloxía ao cidadán, na que estiveron presentes a directora de CPI de Idom, Sandra Sinde; o director rexional norte de Viaqua, Marcos Martín; o director xeral de Innovación Tecnolóxica de Abanca, José Valiño; e o coordinador da Mobile Week Ourense e director da área de Transparencia da Deputación, Fernando Suárez.
Ademais, a sede da CEO acolleu o lanzamento dun proxecto elaborado pola confederación conxuntamente coa Deputación e o INORDE para a promoción de marcas ourensás no Marketplace B2B europeo Ankorstore. A xornada foi inaugurada pola xerente do INORDE, Emma González, e a presidenta da CEO, Marisol Novoa, que nas súas intervencións de benvida resaltaron a importancia dun proxecto que busca impulsar a dixitalización das empresas ourensás para a súa internacionalización. Os posteriores relatorios foron protagonizados polas expertas Gloria Gea, Cristina Martínez e Nina Veiras.
Para completar a xornada, a sede da CEO acolleu as charlas Como obter fondos europeos paso a paso, de Miguel Ángel Domínguez, e O Metaverso chegou para quedar, impartida por Manuel Sánchez Monasterio. E no Marcos Valcárcel, Jose M. Enríquez Trigás abordou os Mecanismos de identificación coa administración pública.