Este venres achégase novamente en streaming o X Concurso Lucus Intercentros

O alumnado de 2º de Realización do Centro de Formación Audiovisual (CFA) da Deputación de Lugo encargarase este venres 20 da emisión en directo do X Concurso Lucus Intercentros que se celebra no IES Muralla Romana da cidade de Lugo. O streaming poderase seguir a partir das 11:00 horas na canle de YouTube do Servizo de Audiovisuais, e na web do propio IES.
O organismo provincial colabora un ano máis coa difusión deste concurso de preguntas e respostas no que participa alumnado de 1º de Bacharelato dos sete institutos da cidade de Lugo: Ánxel Fole, Leiras Pulpeiro, Lucus Augusti, Muralla Romana, Nosa Señora dos Ollos Grandes, Sanxillao e Xoán Montes. O obxectivo da iniciativa é “favorecer a interrelación de alumnado e profesorado dos centros de Educación Secundaria da capital”.
O Concurso, organizado polo Departamento de Administración e Xestión do IES Muralla Romana conta tamén coa colaboración de profesores dos institutos participantes, que elaboran as preguntas do certame. Ademais, o CIFP Politécnico de Lugo encárgase dos pulsadores, e os Departamentos de Informática e de Imaxe Persoal do IES Muralla Romana, da presentación dixital, do peiteado e da maquillaxe.
Segundo explica a Deputación, “a emisión por streaming do Concurso Lucus Intercentros é unha das prácticas en escenarios reais que realiza o alumnado do CFA ao logo do curso, dentro do modelo formativo promovido pola institución, que inviste nun ensino público de calidade”.
Neste caso, a práctica está repartida en dúas xornadas: a do xoves (a dos preparativos supervisados por un técnico e un docente) e o streaming en si mesmo deste venres, no que empregarán varias cámaras e todo o material preciso para a transmisión dun evento a través de Internet. Os estudantes rotarán polos distintos postos, desde realizador e mesturador de vídeo e son, ata operador de cámara, co obxectivo de aproveitar ao máximo esta práctica formativa.
O Concurso Lucus Intercentros desenvolverase a partir das 11:00 horas no salón de actos do IES Muralla Romana. Os equipos, formados por tres alumnos, deberán responder a dez preguntas sobre actualidade económica, política e social e sobre as materias que se imparten en 1º de Bacharelato, como bioloxía, inglés, xeografía ou lingua. Ao remate, ás 13:30 horas, celebrarase a entrega de premios. Os equipos que se clasifiquen nos tres primeiros postos recibirán vales de compra para material informático. Ouros catro, recibirán obsequios do IES Muralla Romana.