Thais Pousada participa en Cabo Verde nun seminario sobre inclusión de rapaces con necesidades especiais

A investigadora do CITIC (Centro de Investigación TIC da Universidade da Coruña) Thais Pousada participou os días pasados (o 9 e 10 de febreiro) en Cabo Verde no Seminario Internacional Incluçao em Rede, organizado pola Universidade de Cabo Verde e a Asociación Colmeia de Pais e Amigos de Crianças e Jovens com Necessidades Especiais. A investigadora interveu na mesa redonda Tessituras inclusivas em debate: desafios contemporâneos na que tivo a oportunidade de presentar os proxectos de innovación docente e o título de Espazo Compartido da Universidade da Coruña, do que é a súa directora académica.
Pousada tamén participou no obradoiro Tecnologias de apoio – acessibilidade e inclusão, direito de todos! que estivo dedicado á presentación de resultados da liña de investigación na creación e deseño de tecnoloxías e produtos de apoio de baixo custo para persoas con diversidades funcionais e cognitivas e a mostrar as posibilidades que ofrece a impresora 3D como “un medio alcanzable e ao alcance dos profesionais para a súa elaboración”.
Esta participación xorde da colaboración que estableceron as entidades caboverdianas co Centro de Recursos para a Inclusão Dixital do Instituto Politécnico de Leiria, no que Thais Pousada está a realizar unha estadía de investigación.
A partir deste primeiro contacto xurdiron novas posibilidades de colaboración entre a Universidade de Cabo Verde e a Asociación Colmeia dirixidas á mellora das condicións de vida da poboación infantil con necesidades especiais da illa de Santiago.