Os desafíos da industria dron centraron un encontro galego no que participaron máis de 150 profesionais

Este 14 de febreiro clausurouse a quinta edición do Congreso Internacional Aeronáutico e Aeroespacial, promovido pola Axencia Galega de Innovación (GAIN) e o Consorcio Aeronáutico Gallego (CAG). No seu transcurso avanzáronse os tres primeiros informes do Observatorio da Industria Aeroespacial de Galicia, que sitúan como principais retos a afrontar polo noso sector o talento, a cooperación e a sustentabilidade. A directora de GAIN, Patricia Argerey, interveu no peche deste evento sectorial, no que participaron máis de 150 profesionais.
O talento, unha maior cooperación entre empresas para acadar máis capacidade de investimento privado e a sustentabilidade como oportunidade e elemento diferenciador son tres dos grandes desafíos da industria aeronáutica e aeroespacial segundo o informe de análise económica do sector e o seu sistema de valor elaborado no marco do Observatorio Galego da Industria Aeroespacial.
O Centro de Investigación Aeroportada de Rozas (CIAR) foi escenario este martes 14 do
V Congreso Internacional Aeronáutico e Aeroespacial promovido pola Xunta de Galicia e o Consorcio Aeronáutico Gallego (CAG), que dá continuidade á xornada monográfica sobre o Polo Aeroespacial de Galicia celebrada o luns 13 de febreiro no mesmo emprazamento.
A directora da Axencia Galega de Innovación (GAIN), Patricia Argerey, destacou “que o sector privado galego debe liderar os vehículos e sistemas non tripulados en España e fóra dela, aproveitando os apoios da Administración autonómica e das convocatorias nacionais e europeas e transformalos en contratos, en novos investimentos en innovación e industriais e en emprego”.
Como dixemos, no congreso presentáronse os tres primeiros informes do Observatorio Galego da Industria Aeroespacial, relativos á análise económica do sector, á análise da cadea de valor en Galicia e a súa integración nas cadeas de valor nacionais e internacionais nos ámbitos civil e de defensa e ao financiamento da I+D no segmento dos sistemas non tripulados na Unión Europea.
Durante o evento, púxose en valor a importancia do investimento público, que atrae investimento privado e empresas tractoras, como é o caso da Civil UAVs Initiative, e destacouse “o traballo de promoción dos sistemas non tripulados realizada pola Xunta de Galicia que supuxo a consolidación deste segmento na Comunidade, propiciando a creación de empresas cun forte potencial de crecemento no deseño, operación e explotación de sistemas aéreos non tripulados”.
Tamén se analizou o potencial das solucións deseñadas no Polo Aeroespacial para ser exportadas, nun futuro próximo, nacional e internacionalmente; así como de proxectos como o U-Space para facer do espazo aéreo europeo un complexo ecosistema no que coexistan en harmonía todo tipo de aeronaves, poñendo especial foco na convivencia segura e eficiente de avións tripulados e drons.
Máis de 150 representantes de empresas líderes da industria aeronáutica e aeroespacial galega, pemes, centros de coñecemento e empresas como Airbus, Babcock, Telespazio, Boeing ou Indra participaron nestes dous eventos.