Aprobada a licitación da xestión da base de datos Oracle que agrupará a información de Santiago

O Goberno de Santiago aprobou este luns 3 de abril o expediente de licitación do contrato mixto de servizos e subministro do Sistema de xestión integral da base de datos Oracle do Concello de Santiago de Compostela, que sae a licitación por 154.215,37 euros, IVE engadido. Este sistema integrará, en palabras do Concello, “todas as bases de datos, actualmente dispersas, co obxecto de ter un maior control da información, así como incrementar de xeito significativo a seguridade da mesma”.
Esta licitación enmárcase dentro de plan de modernización da infraestrutura informática e telemática da Administración local, que está desenvolvendo a concellaría dirixida por Marta Abal. En concreto, o Concello explica que “con esta licitación aprobouse a adquisición de licenzas e a xestión integral dunha base de datos de recoñecido prestixio no ámbito internacional, como é Oracle, co obxecto de convertela no núcleo central e integrador de información de todo o Concello”.
Fontes municipais engaden que “esta adquisición implica apostar pola base de datos mais estendida por todo o mundo, a que máis referencias a nivel empresarial e institucional ten a nivel internacional; e polo sistema de xestión de base de datos relacional mellor valorado a nivel mundial tanto polo persoal técnico como polos usuarios”.
Entre as vantaxes achegará Oracle, resalta a independencia dos datos tanto a nivel físico como dixital; a flexibilidade; a rapidez no manexo de grandes cantidades de información; a súa fiabilidade contrastada pola súa implantación a nivel mundial; e a posibilidade de escalado en función das necesidades. Tamén destaca o propio sistema de auditoría que incorpora para garantir a seguridade, a recuperación ante desastres, o rollback (volta atrás) ante calquera erro, o establecemento de puntos de restauración e o rexistro de actividade con capacidade de análise ante continxencias.
Amais, o Concello explica que “a versatilidade da base de datos que se adquire tamén xoga un papel fundamental xa que permitirá alugar nun só espazo físico a información relativa á Administración Electrónica, á xestión de persoal, á contabilidade e facturación, aos sistemas de información xeográfica, aos sistemas industriais de monitoraxe, á xestión dos procesos específicos dos corpos de seguridade (policía local, bombeiros e protección civil), aos ficheiros ofimáticos de xestión e aos servizos web entre outros”.
O Goberno local destaca igualmente que para garantir a súa continuidade e dispoñibilidade o sistema de xestión de base de datos que se adquire implantarase na nova estrutura de CPD (Centro de Procesamento de Datos) recentemente licenzada polo Concello, “logrando así máis capacidade de computación e maior rapidez nas consultas a información”.
Ao abeiro desa estrutura, o sistema de xestión da base de datos configurarase en dous nodos independentes, co obxecto de dotalo de alta dispoñibilidade e redundancia a efectos de garantir o seu funcionamento durante as 24 horas do día os 365 días do ano.
A duración do contrato é de 3 anos e inclúe o soporte de propio fabricante da base de datos. De feito, e en liña con outras actuacións que se están a desenvolver dentro do plan de modernización do Concello de Santiago referéndase a aposta da Concellaría de Economía, Facenda, Persoal, Contratación e Modernización da Administración Local de poder contar cos sistemas tecnoloxicamente mais avanzados e coas mellores referencias do mercado para “unha mellor prestación de servizos a veciñanza”.