A Cámara de Comercio de Santiago móstranos as claves para facer visible a nosa empresa na Rede

A Cámara de Comercio de Santiago vai organizar este mes de abril, o día 20 pola mañá (de 10.00 a 11.15 horas) unha xornada formativa sobre a necesidade de visualizar a nosa empresa e a nosa actividade nos buscadores e nas redes e facelo ademais dun xeito destacado, continuo e positivo. A xornada SEO ou non SER, o posicionamento é poder abrirá cunha presentación da Oficina Acelera Peme (impulsada por Red.es co apoio de entidades como a Cámara de Santiago) e proseguirá con miolo temático da convocatoria: que son e como son os procesos de dixitalización, o SEO técnico, o SEO Onpage, como facer bos contidos SEO e cales son os principais mitos do posicionamento.
O relator será Hugo Fraga, director de Hyliacom, axencia de mercadotecnia dixital 360, especializada no desenvolvemento de estratexias en liña para maximizar a visibilidade en buscadores. Tamén é director de EasyClient, empresa especializada en configuracións web e tendas enl iña, orientada ao posicionamento SEO.
Esta xornada está organizada pola Oficina Acelera Peme da Cámara de Comercio de Santiago de Compostela que se inclúe en Programa Operativo Plurirrexional de España FEDER 2014-2020 (POPE), co-financiado polo Fondo Europeo de Desenvolvemento Rexional (FEDER) e pola Entidade Pública Empresarial Redles (entidade adscrita ao Ministerio de Asuntos Económicos e Transformación Dixital a través da Secretaría de Estado de Dixitalización e Intelixencia Artificial).