Esta semana do 15 de maio a Deputación de Pontevedra, a través do programa SmartPEME de asesoramento tecnolóxico para pemes (Pequenas e Medianas Empresas) e persoas autónomas, achega dúas novas accións formativas enmarcadas na súa carteira de obradoiros que se celebrarán de xeito telemático. Estes obradoiros estarán adicados ao posicionamento SEO (visualización en buscadores) e o deseño de páxinas webs a través de Elementor.
Mañá martes, ás 18 horas, terá lugar o obradoiro Iniciación ao SEO II: optimiza a túa páxina web para gañar visibilidade, no que se dará a coñecer os factores externos que afectan ás páxinas web e condicionan o seu posicionamento, así como a optimización das prácticas en SEO e a súa medición a través da analítica web para poder mellorar os resultados. A dita acción formativa será impartida por Adrián Fernández, licenciado en Comunicación Audiovisual cunha ampla experiencia e traxectoria profesional asesorando empresas de diversos sectores no eido da comunicación dixital e a mercadotecnia en liña.
O xoves 18, ás 12 horas, comezará o obradoiro Deseña a túa páxina web de maneira sinxela con Elementor. Elementor é un construtor de balde de páxina de WordPress, o que permite crear sitios web profesionais de maneira doada e rápida, sen precisar coñecementos previos sobre programación e código. Este obradoiro será impartido por Laura Carrera, graduada en Publicidade e Relacións Públicas e Posgraduada en Dirección de Comunicación Corporativa que conta cunha ampla experiencia asesorando empresas no ámbito da comunicación e a mercadotecnia dixital.
