31 alumnos de seis centros de FP galegos participan nunha formación audiovisual de Netflix e Fad Juventud

Un total de 31 alumnos de FP de grao superior de seis centros galegos están a recibir formación por parte da plataforma de streaming Netflix ao abeiro do acordo establecido entre a empresa audiovisual, a Xunta, a produtora galega Vaca Films e a fundación FAD Juventud. A iniciativa Formando equipo: traballa no audiovisual, en cuxo deseño tamén participou a produtora Zeta Studios, busca desenvolver novos talentos técnicos enfocados ao ámbito audiovisual nas familias profesionais de Electricidade e electrónica e de Administración e xestión.
A formación, cunha duración total de 38 horas, desenvólvese no CIFP Politécnico de Santiago desde finais do mes de abril e estenderase ata o 3 de xuño. Participan nela 16 alumnos de ciclos da familia de Administración e xestión, en concreto seis do instituto IES Fernando Wirtz Suárez (A Coruña), dous do Muralla Romana (Lugo) e oito do CIFP Portovello (Ourense).
No caso do alumnado dos ciclos da familia de Electricidade e electrónica son un total de 15, cinco deles procedentes do Instituto IES Urbano Lugrís (A Coruña), oito do CIFP Politécnico de Santiago e dous do IES Politécnico de Vigo.
A orixe
O conselleiro de Cultura e Educación, Román Rodríguez, reuniuse o pasado mes de outubro con Emma Lustres, de Vaca Films, e con representantes de Netflix para analizar a proposta. En palabras do titular do departamento educativo do Goberno galego, “para a Xunta é moi importante contar con compañías punteiras para formar os mellores profesionais e seguir así ampliando o gran momento do audiovisual galego, garantindo que as rodaxes que acollemos conten con técnicos cualificados”.
Formación e valores
O programa Formando equipo: traballa no audiovisual consta de 38 horas de formación teórica e práctica que procuran dar a coñecer as oportunidades profesionais no sector audiovisual para familias de FP cuxas saídas profesionais non están orixinalmente vencelladas a este sector.
Nestas actividades as persoas participantes aprenden a desenvolver habilidades persoais específicas neste ámbito, como a creatividade, a resolución de problemas ou o traballo colaborativo. Así mesmo, afondan na realidade do sector con visitas ás rodaxes, sesións con especialistas técnicos e charlas con profesionais de producións de Netflix, que lles dan a coñecer a súa propia experiencia. O proceso de formación completarase cunha estancia de prácticas formativas en Vaca Films para algúns dos estudantes participantes.