Vodafone España reduciu un 14,5% o seu consumo enerxético por tráfico de datos na rede no último ano fiscal

Vodafone España fixo balance dos seus logros en recentes en sustentabilidade. No informe salienta o seguinte dato: a operadora foi quen de reducir nun 14,5% o consumo de enerxía por tráfico de datos de rede móbil e fixa (52,8kWh/TB versus 45,177kWh/TB) no último ano fiscal, entre abril de 2022 e marzo de 2023. “Desta forma duplicamos o aforro enerxético con respecto ao exercicio anterior (7%) a pesar dun aumento no tráfico de datos de rede fixa e móbil do 11,4%”, informa a compañía, que para lograr estes fitos tivo que traballar en varias frontes de transformación de rede durante o último ano.
Entre as iniciativas destacan o apagado da rede de cobre (coa migración da súa carteira de clientes de tecnoloxías de cobre, como o ADSL, a tecnoloxías máis eficientes como a fibra ou FTTH que permiten manexar unha maior cantidade de datos con menos consumo enerxético), os procesos de consolidación e virtualización da rede CORE con novo equipamento de última xeración (que incrementa a eficiencia enerxética, facilita a xestión de infraestruturas asociadas e permite novas oportunidades de apagado de redes obsoletas) ou a substitución dos equipos SAI ou Sistema de Alimentación Ininterrompida e equipos de enerxía máis antigos por novos modelos que reducen as perdas un 10% e melloran o rendemento enerxético da infraestrutura. Vodafone tamén está a realizar a migración dos seus clientes móbiles a servizos como VoLTE (Voz sobre LTE), que permite utilizar 4G para chamadas de voz e que supera xa o 50% dos minutos de voz rexistrados, ou VoWIFI (Voz sobre Wi-Fi), que facilita chamadas de voz en Wi-Fi optimizando a calidade en interiores.