RTVE Play esixirá rexistro para acceder aos seus contidos

O servizo de vídeo baixo demanda da Corporación de Radio e Televisión Española, RTVE Play, está a ter un éxito tal que decidiron tomar unha medida restritiva na súa renovación, de xeito que para ver os seus contidos será imprescindible estar rexistrado.
Co rexistro a plataforma poderá coñecer mellor aos seus usuarios e ofrecer unha experiencia personalizada. O rexistro de balde facilitará que os usuarios poidan conservar o punto no que están a ver un programa para retomalo cando queiran e no dispositivo que desexen; poderán subscribirse aos programas que máis interesen para saber cando hai novas emisións; será posible crear listaxes; e tamén recibiranse recomendacións baseadas nos programas que máis gustan e nas preferencias doutras persoas con gustos semellantes.
Lembremos que RTVE Play ofrece de balde vídeo en directo e vídeo baixo demanda, incluíndo todos os programas e series de TVE, así como cine español e internacional, cun catálogo tan amplo e tan accesible que impulsou a plataforma a liderar o vídeo baixo demanda en aberto en España, de aí que non sorprenda que agora poñan unha pequena cancela para evitar un consumo dos seus contidos dun xeito indiscriminado.