Logitech lanza un rato con botón de IA

Non só Microsoft quere que os teclados dos nosos ordenadores teñan unha tecla específica para invocar ao seu asistente con intelixencia artificial, senón que agora tamén é a propia Logitech a que busca algo semellante cunha Signature AI Edition do seu rato sen fíos M750, que destaca por integrar un botón dedicado á IA, que lanza a aplicación Logi AI Prompt Builder.
Esta nova aplicación é basicamente un atallo a ChatGPT, de xeito que o usuario, cando prema o botón de IA do seu rato, abrirá unha fiestra emerxente dende a que poder activar prompts para ChatGPT que resulten de utilidade e poidan mellorar a produtividade reescribir un texto, resumilo, responder ou crear un correo electrónico (coa posibilidade de incorporar novas receitas á aplicación).
Polo momento esta nova prestación só está dispoñible para ChatGPT e en inglés, de aí que este novo rato polo momento estea só dispoñible nos EE.UU. e Reino Unido a un prezo de 49,99 dólares e 54,99 libras esterlinas respectivamente, pero é de esperar que no futuro se adapte a máis mercados e idiomas.
O novo rato de Logitech tamén permite configurar o botón de retroceder para invocar a ChatGPT e o botón de avanzar para activar o ditado do sistema operativo, polo que semella que Logitech confía en que a IA vaia estar cada día máis presente en tarefas de produtividade e queren adaptarse rapidamente a tal escenario.