Meta estrea un editor de vídeo para competir con CapCut

Como clara resposta ao éxito de CapCut, Meta vén de lanzar Edits, unha aplicación pensada para facilitar a produción de vídeos directamente desde o teléfono móbil. A ferramenta, dispoñible desde hoxe, preséntase como unha solución todo en un que pretende simplificar un proceso da edición de vídeo. Segundo a compañía, un dos principais obxectivos é ofrecer un espazo intuitivo e funcional para traballar con vídeo sen depender de múltiples plataformas.
Entre as funcionalidades destacadas inclúense a posibilidade de gravar vídeos de ata 10 minutos, unha xestión de proxectos optimizada e a exportación directa a Instagram e Facebook sen marcas de auga. Ademais, incorpora ferramentas de edición avanzadas, como unha liña de tempo con precisión fotograma a fotograma, edición por clip, melloras automáticas e efectos como pantalla verde ou transicións visuais.
A aplicación tamén ofrece información en tempo real sobre o rendemento dos vídeos, con indicadores como a taxa de abandono, o que permite aos usuarios avaliar que contidos están a funcionar mellor e axustar as súas estratexias.
De cara ao futuro, Meta xa anunciou novas funcionalidades en desenvolvemento, como a incorporación de fotogramas clave para controlar con maior precisión o movemento e os efectos, a modificación visual de vídeos mediante intelixencia artificial, ou a posibilidade de colaborar en tempo real con outros usuarios. Tamén se prevé ampliar as opcións creativas con novos tipos de letra, efectos de voz, animacións de texto, transicións e música libre de dereitos.
A aplicación está dispoñible para a súa descarga para iPhone e para Android.