WhatsApp presenta as súas vindeiras novidades

WhatsApp anunciou un conxunto de novas funcións orientadas a facilitar o seu uso entre distintos dispositivos e servizos de terceiros. As novidades inclúen a posibilidade de crear unha conta directamente desde un iPad, unha renovación da experiencia en CarPlay e Android Auto, a edición de documentos PDF na propia aplicación e a integración con Apple Music e Spotify para compartir cancións nos estados.
A aplicación para iPad permite agora rexistrar unha conta de WhatsApp sen necesidade de vinculala previamente a un teléfono móbil. Ata o de agora, o uso da versión para a tableta dependía dun dispositivo principal, pero a nova opción permite completar todo o proceso de alta directamente desde o iPad.
Tamén se renovou a experiencia de uso de WhatsApp nos sistemas Apple CarPlay e Android Auto. A nova interface permite escoitar e responder mensaxes, realizar chamadas, consultar o historial de chamadas e acceder aos contactos favoritos mediante controis mans libres desde a pantalla do vehículo.
Outra das novidades afecta ao manexo de documentos PDF. Os usuarios das versións web e de escritorio poden abrir estes ficheiros directamente en WhatsApp sen necesidade de descargalos previamente e realizar edicións básicas, como resaltar texto ou engadir anotacións. Esta funcionalidade baséase en tecnoloxía de Adobe Acrobat.
WhatsApp incorpora ademais unha integración con Apple Music e Spotify que facilita compartir cancións directamente nos estados da aplicación. Deste xeito, os contactos poden ver a música que está a escoitar o usuario nese momento mediante unha publicación creada con apenas un par de pulsacións.
Todas estas funcións comezan a distribuírse progresivamente entre os usuarios a partir de hoxe.