Grokipedia, a enciclopedia xerada por intelixencia artificial que xAI puxo en marcha en outubro de 2025 como alternativa a Wikipedia, leva aparentemente paralizada desde o pasado 24 de abril. Segundo unha investigación publicada por Lawfare, desde esa data non se aprobaron nin rexeitaron novas propostas de edición e tampouco hai indicios de que o sistema siga actualizando automaticamente os seus máis de 6 millóns de artigos.
A plataforma baséase nun modelo de linguaxe que redacta e mantén os seus propios contidos. Os usuarios poden propoñer cambios mediante un formulario, que deberían pasar por un proceso de revisión antes de seren aceptados, rexeitados e finalmente incorporados ao artigo correspondente. Cada entrada conserva un rexistro público de todas esas modificacións.
Os autores da investigación comprobaron que numerosas propostas de corrección permanecen bloqueadas co estado en revisión desde hai meses. Entre elas figura unha actualización da páxina de SpaceX para incorporar a súa saída a bolsa, acontecemento producido o 12 de xuño e amplamente documentado por fontes públicas. Outras suxestións semellantes, enviadas por distintos usuarios, continúan sen resposta.
A análise estendeuse a 34.519 páxinas con propostas de edición, que acumulaban un total de 225.496 suxestións. Segundo os datos recompilados, non existe ningún rexistro de correccións aceptadas nin rexeitadas durante os últimos tres meses, independentemente da temática ou da popularidade do artigo.
A investigación tamén detecta outro problema relacionado coa trazabilidade dos cambios. Unha reestruturación realizada o 14 de marzo parece romper as ligazóns entre as propostas de edición e os fragmentos de texto aos que facían referencia. Como consecuencia, numerosas modificacións que anteriormente figuraban como aceptadas aparecen agora marcadas como rexeitadas coa mensaxe «Highlighted section not found», aínda que nalgúns casos o seu contido si foi incorporado ao artigo correspondente. Isto compromete a fiabilidade do historial de edicións, que constitúe o principal mecanismo público para auditar o funcionamento interno de Grokipedia.
Os datos indican ademais que a paralización comezou antes de que os usuarios percibisen o problema. Os sistemas automáticos internos, identificados como grok e Grok Editor, responsables de preto do 58 % de todas as solicitudes de edición, deixaron progresivamente de xerar modificacións entre marzo e mediados de abril. Desde finais dese mes todas as propostas proceden exclusivamente de usuarios humanos, pero permanecen indefinidamente na cola de revisión.
A investigación descarta que o bloqueo responda a unha vaga de spam ou vandalismo. O 97 % das solicitudes analizadas correspondían a actualizacións de información factual e, antes da interrupción, o sistema aceptaba ou implementaba o 76,5 % delas.
Outro indicio da paralización é a desaparición da páxina pública que mostraba en tempo real a actividade editorial da plataforma. Ese fluxo deixou de funcionar entre mediados de xaneiro e comezos de marzo. Ademais, a comparación de arredor de 480 páxinas conservadas no Internet Archive non atopou cambios no texto dos artigos entre as versións anteriores e posteriores ao 24 de abril.
A falta de explicacións tamén provocou inquietude entre os colaboradores máis activos. Aínda que máis da metade dos usuarios realizou unha única proposta de edición, un reducido grupo de 13 colaboradores concentra o 42,6 % de todas as correccións enviadas, con case 40.000 solicitudes. O usuario máis prolífico chegou a presentar máis de 8.000 modificacións repartidas por unhas 4.000 páxinas.
Os autores do estudo advirten de que unha enciclopedia cuxos artigos permanecen conxelados sen aviso e cun historial de edición potencialmente inconsistente pode contribuír á difusión de información desactualizada e dificultar a corrección de erros.
