Digi duplica desde hoxe a velocidade da súa tarifa Fibra Smart, que pasa de ofrecer 1 Gbps a alcanzar os 2 Gbps sen modificar o prezo, que se mantén en 20 euros ao mes (32 euros/mes de incluír tamén dúas liñas móbiles con chamadas e datos ilimitados).
A nova velocidade permite reducir os tempos de descarga de arquivos de gran tamaño e mellorar a fluidez das conexións destinadas ao xogo en liña ou ao consumo de contidos en streaming. A tarifa está dispoñible para novos clientes sempre que conten con cobertura XGS-PON na súa zona e inclúe un router Wi-Fi 7 XGS-PON.
Os clientes que xa teñan contratada a modalidade Fibra Smart de 1 Gbps tamén poden acceder á nova velocidade. Dependendo do modelo de router instalado e da cobertura XGS-PON, a actualización pode aplicarse automaticamente ou requirir a substitución do equipo.
A través da pantalla de inicio de Mi Digi, a área de clientes de Digi, é posible comprobar se a conexión xa funciona a 2 Gbps ou se é necesario actualizar o router. Para aproveitar plenamente a velocidade é preciso contar cun equipo XGS-PON e con dispositivos compatibles.
O novo router Wi-Fi 7 XGS-PON ofrece, ademais da maior velocidade, menor latencia e maior capacidade para conectar varios dispositivos de maneira simultánea. Digi sinala tamén unha mellora de ata o 30 % na cobertura Wi-Fi dentro do fogar.
A actualización do router pode solicitarse actualmente por teléfono nos números 1200, de balde desde unha liña Digi, e 919 120 120, desde outros operadores. O cambio ten un custo de 30 euros se o cliente opta pola autoinstalación ou de 60 euros se solicita a instalación por parte dun técnico. A posibilidade de solicitar a substitución directamente desde Mi Digi chegará proximamente.
A nova tarifa de 2 Gbps mantén así os 20 euros mensuais da anterior modalidade de 1 Gbps, aínda que o acceso está condicionado á dispoñibilidade de cobertura XGS-PON.
