Orange recibirá 3,98 millóns de euros en axudas públicas para despregar redes 5G en zonas rurais de Galicia, mentres que Telefónica Móviles España obterá outros 854.660 euros, segundo a proposta de resolución provisional da primeira convocatoria do programa Redes Moi Rurais 5G, publicada polo Ministerio para a Transformación Dixital e da Función Pública. A contía destinada a Galicia suma así preto de 4,84 millóns de euros.
Orange figura como principal adxudicataria provisoria desta convocatoria estatal, con 12,24 millóns de euros dos 17,45 millóns en subvencións propostos para o conxunto de España. A operadora anunciou que os fondos lle permitirán instalar 82 novos emprazamentos en zonas sen cobertura móbil. O programa pretende estender a 5G a municipios de baixa densidade de poboación que non dispoñen de cobertura 4G ou 5G de ningún operador e nos que tampouco se prevén despregaduras comerciais nos próximos tres anos.
A relación de localidades galegas incluídas no mapa difundido por Orange abrangue 27 concellos, repartidos polas catro provincias, que serían: A Baña, A Gudiña, Arzúa, As Pontes de García Rodríguez, Cabana de Bergantiños, Cedeira, Cee, Coristanco, Dodro, Folgoso do Courel, Guntín, Mazaricos, Melide, Monfero, Negreira, Nogueira de Ramuín, O Barco de Valdeorras, O Vicedo, Outes, Paderne de Allariz, Rodeiro, Rubiá, Toques, Trazo, Triacastela, Val do Dubra e Vilalba.
A convocatoria conta cun orzamento total de 17,9 millóns de euros, financiado principalmente con fondos europeos Feder. As propostas aprobadas provisionalmente abranguen 129 emprazamentos técnicos e 358 zonas elixibles en todo o territorio estatal. O importe financiable das solicitudes ascendía a 26,09 millóns de euros, por riba dos 17,45 millóns de axudas propostos.
