O 68,7 % da poboación galega de 16 a 74 anos dispón de competencias dixitais básicas ou avanzadas, fronte ao 61,4 % de 2025, o que supón un incremento relativo do 11,9 %. O 42,6 % da poboación galega de 16 a 74 anos ten competencias dixitais avanzadas, cinco puntos porcentuais máis ca en 2025, e o 26,1 % ten competencias básicas.
Son datos publicados hoxe polo INE no informe sobre equipamento e uso das TIC nos fogares, analizados polo Observatorio da Sociedade da Información (OSIMGA) da Axencia para a Modernización Tecnolóxica de Galicia (AMTEGA).
Uso das TIC e compras por Internet
No informe dise que a totalidade dos mozos e mozas galegos de 16 a 24 anos utiliza Internet acotío, entendido como un uso de polo menos cinco días á semana. A cifra medra 1,3 puntos respecto de 2025 e supera en 1,5 puntos a media estatal.
As compras por Internet nos últimos tres meses pasan do 56,7 % ao 62,9 % da poboación galega de 16 a 74 anos, un incremento de 6,2 puntos.
Entre as persoas de 25 a 34 anos, a porcentaxe aumenta 9,6 puntos, ata o 83,1 %, e supera o 82,6 % estatal. Neste punto, a investigación conclúe que Galicia gaña tres postos neste grupo e alcanza a sétima posición.
O INE tamén rexistra un avance entre as persoas de 55 a 64 anos: a proporción de compradores en liña entre as persoas desta idade sobe ata o 53,8 %, 8,5 puntos máis. Ademais, as compras por Internet tamén superan a media estatal entre os 35 e os 44 anos, cun 79,3 % fronte ao 76,4 %, e entre os 45 e os 54 anos, cun 73,0 % fronte ao 71,0 %.
Por outra banda, saliéntase que o crecemento das compras por Internet é especialmente destacado nos fogares unipersoais. Neste grupo, indícase, a porcentaxe que comprou en liña nos últimos tres meses pasa do 44,4 % en 2025 ao 61,4 % en 2026, un incremento de 17 puntos porcentuais. Galicia gaña doce postos e sitúase na terceira posición entre as comunidades e cidades autónomas.
Intelixencia artificial
Os datos analizados polo OSIMGA conclúen tamén que “case a metade da poboación galega de 16 a 74 anos, o 47,2 %, utilizou algunha ferramenta de intelixencia artificial xerativa nos últimos tres meses, fronte ao 32,2 % de 2025”. E engádese: “Este incremento de 15 puntos porcentuais débese sobre todo ao uso con fins privados, que pasa do 24,8 % ao 41,9 %”.
Polo que respecta ao uso por motivos profesionais, medra 8,9 puntos, ata o 23,1 %, e o vinculado á educación formal, 5,2 puntos, ata o 19,8 %.
Interacción coas administracións públicas
O INE informa tamén de que o 82 % dos galegos emprega a Administración Electrónica, unha porcentaxe lixeiramente superior á media estatal. Engádese que “Galicia ocupa a terceira posición no acceso por Internet a bases de datos ou rexistros públicos, como os catastrais ou os de empresas” e que “o 30,0 % da poboación de 16 a 74 anos utilizou esta opción nos últimos doce meses, fronte ao 29,0 % estatal”. A porcentaxe medra 3,1 puntos respecto de 2025 e a Comunidade gaña dúas posicións.
A descarga ou impresión de formularios oficiais alcanza o 45,1 % da poboación usuaria de Internet nos últimos 12 meses de 16 a 74 anos, 3,6 puntos máis que en 2025.
Equipamento no fogar e acceso a Internet
Na investigación sinálase tamén que o 81,6 % das vivendas galegas con algún membro de 16 a 74 anos dispón de ordenador, 1,1 puntos máis que en 2025. A presenza de ordenadores de sobremesa ou portátiles sobe do 73,6 % ao 76,4 %, e a de tabletas pasa do 54,5 % ao 57,3 %. O acceso a Internet chega ao 96,8 % das vivendas da Comunidade, cun incremento de 0,3 puntos.
Ademais, conclúese que “o acceso a Internet supera o 94 % das vivendas galegas en todos os tramos de poboación” e que “nas cidades de máis de 100.000 habitantes e nas capitais de provincia a taxa chega ao 98,9 %, 1,4 puntos máis ca no ano anterior e 0,4 puntos por riba da media estatal para ese grupo”. Nos concellos de 50.000 a 100.000 habitantes sitúase no 97,9 %, fronte ao 97,7 % estatal, e nos de menos de 10.000 habitantes alcanza o 94,6 %.
