Unha interrupción nos servizos de Microsoft está a provocar problemas de acceso e funcionamento en distintas ferramentas de Microsoft 365, entre elas Exchange Online, Outlook, Teams e Copilot. A incidencia, detectada onte, ten alcance internacional e está a afectar a usuarios de numerosos países.
Microsoft confirmou problemas de acceso ás caixas de correo de Exchange Online e dificultades para utilizar distintas funcións de Teams. Os avisos publicados nos seus perfís oficiais en X identifican as incidencias cos códigos EX1550543 e TM1550488, respectivamente.
Os fallos afectan á dispoñibilidade dos servizos e poden impedir o acceso ao correo electrónico, á mensaxaría e a outras ferramentas de produtividade. A incidencia tamén repercute en servizos de terceiros que dependen da infraestrutura de Microsoft.
A investigación inicial apunta a problemas na infraestrutura da multinacional. Varios servidores quedaron fóra de servizo e trasladaron unha carga adicional aos equipos que seguían operativos, provocando unha degradación do funcionamento xeral. Microsoft descartou que a interrupción estivese relacionada cun ciberataque.
Para recuperar a normalidade, están a aplicar medidas como o desvío do tráfico cara a infraestruturas non afectadas, a suspensión de actualizacións e o reinicio dos servidores con problemas. Os primeiros intentos non conseguiron restablecer completamente os servizos.
A compañía de Redmond comezou a detectar sinais de estabilización, aínda que a recuperación non se completara na última actualización consultada.
