Onte celebrouse a gala da XXVII edición do Premio Emprende Coruña, organizada por AJE Coruña e AJE Galicia e celebrada no Club Cámara Noroeste, coa colaboración do Concello. A rexedora Inés Rey clausurou o encontro, que reuniu representantes do tecido empresarial e institucional da provincia co obxectivo de recoñecer o talento, a innovación e a capacidade de iniciativa das persoas emprendedoras.
Nesta edición concorreron catorce empresas finalistas con proxectos vinculados a sectores como a intelixencia artificial, a inclusión social, a saúde, a cultura, a agricultura, a alimentación e a sustentabilidade.
Segundo salientou AJE Coruña, “as propostas presentadas reflicten a diversidade do tecido emprendedor da provincia e a súa capacidade para incorporar novas tecnoloxías, desenvolver solucións innovadoras e dar resposta a necesidades sociais e económicas”.
O Premio Iniciativa Empresarial recaeu en Danza 10, mentres que Tribo recibiu o Premio Iniciativa Emprendedora. Pola súa banda, os accésits á Innovación, á Creación de Emprego e á Responsabilidade Social Corporativa foron para Pan de Juevo, Yakart e Atlántica Inclusión, respectivamente.
A alcaldesa participou, xunto coa presidenta de AJE Coruña, Eva Rosende, na entrega do Premio Iniciativa Empresarial, un dos principais galardóns do certame.
Durante a clausura, Rey felicitou ás empresas premiadas e ao conxunto das candidaturas, destacando a importancia de favorecer un ecosistema económico que permita reter talento e xerar emprego de calidade.
“Queremos que as mozas e os mozos que se forman na Coruña poidan quedar na Coruña”, sinalou a rexedora, quen incidiu “na necesidade de facilitar oportunidades para que as novas xeracións poidan desenvolver os seus proxectos profesionais na cidade”.
Salientou que A Coruña “está a reforzar o seu posicionamento como un dos principais polos económicos e tecnolóxicos de Galicia, con proxectos estratéxicos como a Cidade das TIC e a implantación da Axencia Española de Supervisión da Intelixencia Artificial (AESIA), iniciativas que se complementan coas políticas municipais de apoio ao emprendemento, á formación e á inserción laboral”. Destacou tamén que o Concello conta cunha rede de Centros Municipais de Empresas que ofrece espazos e recursos de acompañamento ás persoas emprendedoras. Entre eles destaca Accede Papagaio, que este ano cumpriu unha década de actividade e polo que xa pasaron preto de setenta iniciativas empresariais.
Ademais, nos últimos anos o Goberno municipal captou máis de oito millóns de euros para programas de emprego e formación que contribuíron a que máis de 1.600 persoas accederan a un posto de traballo na cidade.
Estas actuacións forman parte da estratexia municipal para favorecer a creación e consolidación de empresas, impulsar a competitividade do tecido económico e facilitar novas oportunidades laborais. Neste sentido, a alcaldesa defendeu a necesidade de que o dinamismo empresarial repercuta no conxunto da cidadanía. “O crecemento económico e o progreso social teñen que avanzar da man”, destacou Rey.
A gala incluíu tamén unha homenaxe ao empresario Daniel Ramos Lobón, distinguido como Padriño de Honra desta vixésimo sétima edición pola súa contribución ao asociacionismo empresarial coruñés e galego.
Vinculado ao sector das novas tecnoloxías, Ramos Lobón presidiu AJE Coruña cando a entidade se denominaba Asociación de Jóvenes Empresarios Marineda e foi fundador de AJE Galicia, contribuíndo ao fortalecemento dos espazos de representación e colaboración empresarial na comunidade. Ademais, formou parte do Consello de Administración do Real Club Deportivo da Coruña, mantendo unha estreita vinculación coa vida social e institucional da cidade.
A presidenta de AJE Coruña, Eva Rosende, foi a encargada de entregarlle esta distinción, coa que a entidade recoñeceu o seu compromiso co desenvolvemento do tecido empresarial e co apoio ás novas xeracións de persoas emprendedoras.
O acto contou tamén coa participación da deputada provincial Rosa Ana García López e da secretaria xeral de Emprego e Relacións Laborais da Xunta de Galicia, Susana Pérez Iglesias. A alcaldesa clausurou a gala agradecendo o traballo de AJE e das entidades colaboradoras na promoción do emprendemento, e reiterando o compromiso do Concello coa creación de emprego e novas oportunidades na cidade.
