Nace a Fundación que rexerá o Centro Tecnolóxico de Telecomunicacións de Galicia

Os 15 patróns da Fundación Centro Tecnolóxico de Telecomunicacións de Galicia (Gradiant) reuníronse en Vigo para asinar a constitución do ente que rexerá o Centro Tecnolóxico de Telecomunicacións de Galicia nomeáronse coma presidente, vicepresidente e secretario respectivamente a Fernando Xabier Blanco Álvarez, conselleiro de Innovación e Industria; José Luis Fernández Carnero, director de estratexia de Televés; e Manuel Joaquín Reigosa Roger, vicerreitor de Investigación da Universidade de Vigo.
Trala sinatura da acta fundacional, patróns e fundadores celebraron a primeira asemblea na que se acordou o nomeamento do director xeral do Centro, cargo que ocupará Fernando Pérez González, catedrático da Universidade de Vigo.
O Centro Tecnolóxico de Telecomunicacións procurará contribuír á mellora da competitividade do sector das telecomunicacións en Galicia a través do desenvolvemento tecnolóxico e a excelencia investigadora xuntando ás 3 universidades galegas, ás máis importantes empresas de hardware e software (Televés, Arteixo Telecom, Egatel e Indra) e asociacións de PEME do sector (Ineo). Tamén forman parte do padroado Arantia 2012, Gsertel e Tredess.
O director xeral de Gradiant fixou como obxectivo para os vindeiros 5 anos que o Centro conte con 50 investigadores dos que agardan que un 30% sexan doutores.