O Firefox farase social mediante Mozilla Weave

Os laboratorios de Mozilla anunciaron un novo proxecto que permitirá almacenar na Rede datos da configuración do noso navegador de Internet como preferencias, marcapáxinas, historial e contrasinais para permitir a súa sincronización nos nosos equipos (ordenador de sobremesa, portátil e móbil, por exemplo) que podería conformar a base dun futuro Firefox Social.
Mozilla Weave está aínda nunha fase de desenvolvemento inicial, e precisa para funcionar a versión de proba do Firefox 3.0b2pre ou posterior (dispoñible para Windows, Mac OS X e Linux). Pretende servir para dispor dun sistema básico de navegadores remotos, facilitará o uso de servizos baseados en estándares abertos, dará un control total dos nosos datos (permitindo personalizar o xeito de compartilos) e construirá unha arquitectura extensible (coma Firefox).
Nun principio Weave sería unha solución axeitada coma copia de respaldo dos datos do novo navegador web, para facer doada a mobilidade do usuario e o uso de distintos equipos conservando as preferencias ou xestionar de forma colaborativa os nosos marcapáxinas.
Dende Mozilla xa publicaron o Weave 0.1, estimando que a primeiros de 2008 chegará o Weave 0.2, de xeito que pouco a pouco se avanzará ata unha solución completa que podería ser a chave no Firefox 3.